MIDSAYAP, North Cotabato -- Principal nga naglingkod lang sa kyosko sulod sa tulunghaan ang gipusil patay mga alas 12:15 sa udto sa nag-inusarang suspek.
Giila ni Midsayap chief of police, Superintendent Joan Maganto ang biktima nga si Anok Satol Dagadas, 53, minyo, principal sa Kadigasan Elementary School sa Barangay Kadigasan.
Patay gilayon si Dagadas human maigo sa ulo ug likod nga bahin sa lawas gamit ang kalibre .45 nga pistola.
Samtang ang suspek misibat ug misakay og motorsiklo sa naghulat niya nga kauban.
Daghan ang nagtuo nga posibleng selos sa posisyon sa biktima ang motibo sa pagpatay kaniya.
Apan kapulisan sa Midsayap Municipal Police Station padayon pang nagsubay sa insidente aron nga matumbok ang tinuod nga motibo ug ang mga suspek. (Edgar E. Fuerzas)