CARMEN, Davao del Norte -- Sikop ang lima ka mga gituohang suspek sa motornapping human sila nasiplatan sa otoridad sa Purok 6, Barangay Ising, Carmen, alas 12:20 sa udto niadtong Miyerkules, Oktubre 17.
Gilayong miresponde ang Carmen Municipal Police Station ug ang mga personahe sa Highway Patrol Group (HPG) 11 nga miresulta sa pagkasikop nila Felmar Tagaamo Libre, 18; Richard Eneves Gonzago, 18; Wendel Dave Medel, 18; Cristine Jae Gabriel Cartagena, 18; ug usa ka Janric Nuena Marsagay, 18; ang mga nahisgutang pulos nagpuyo sa Tagum City ug Compostela Valley Province.
Narekober sa ilang mga posisyon ang mga motorsiklo nga daan nang gipangita sa otoridad.
Kasong pagsupak sa Republic Act 10883 kon New Anti-Carnapping Act of 2016 ang atubangong kaso sa mga nahisgutan didto sa korte.
“We will look into the background of these person and their involvement to some robbery incident. Rest assured that PRO11 will continue to make headway in containing this criminality if not stopping this menace of carnapping in the region,” sulti ni PRO-Davao director Chief Supt. Marcelo Morales. (Jeepy P. Compio)