MALAMPUSONG nasikop ang usa ka kapitan sa barangay ug laing tulo pa ka mga tawo sa gipahgayon nga operasyon sa Police Regional Office (PRO)-Davao Biyernes sa kaadlawon, Oktubre 19.
Dala sa mga pulis ang upat ka mga search warrants nga dunay mga numero 073-2018 ngadto sa 075-2018 sa kalapasan sa Sec. 11, sa Republic Act 9165 nga gi-isyu ni Hon. Judge Emilio Dayanghirang III sa RTC Branch 32, sa 11th Judicial Region, Lupon Davao Oriental batok sa kapitan nga si Erwin Barabag; laing pang pinangita sa balaud nga sila Ruth Petiluna, Marjun Generale, Em-em Wenceslao, ug usa ka Baby Shane Palma pulos nagpuyo sa munisipalidad sa Lupon, Davao Oriental.
Usa ka joint operation ang gikasa sa PRO-Davao ug sa ubang unit sa otoridad nga miresulta sa pagkasikop ni Barangay Kapitan Erwin Barabag didto sa iyang panimalay sa Purok Mansanitas, Barangay Macangao, Lupon samtang kini tulog pa.
Nakuha sa iyang posisyon ang usa ka .45 kalibre nga pistola nga dunay unom ka mga buhing bala; ug dunay mga pakite sa gituohang shabu.
Si Kapitan Barabag giingong nalakip sa high-value targets (HVTs) list ni Pangulong Rodrigo Duterte nga dugay nang gipanid-an sa otoridad.
Sikop sab sila Em-em Wenceslao, nagpuyo sa Purok Claro, Barangay Poblacion, Lupon; kinsa nakuhaan sab og gituohang shabu sud sa balay niini. Atol sa hitabo, usa ka PFC Rhean Baligwat, giingong miyembro sa Philippine Army ug nadestino sa 67IB, ang anaa sud sa balay sa suspek ug nakuha sa iyang posisyon ang usa ka fragmentation grenade, tulo ka mga bala sa .45 nga pistola ug tulo ka bala sa .9mm ingon mga mga nagkadaiyang drug paraphernalia.
Nasikop sab si Marjun Generale sa ilang bunk house sa Purok Townsite, Brgy. Corporation, Lupon diin upat ka mga pakite sa gidudahang shabu ang nakuha sa iyang posisyon samtang ang kauban niini nga si Ruth Petiluna, naka-iskapo sa operasyon.
Samtang ang pag-serve sa search warrant ni Baby Shane Palma, napakyas ang kapulisan tungod nakasibat kini apan dunay mga shabu ang nakuha sa balay sa suspek.
Gipangdala na ang mga nahisgutan sa Lupon Municipal Police Station diin gipang-andam na ang mga posibleng kaso nga ipasaka batok kanila didto sa korte. (Jeepy P. Compio)