USA ka job order (JO) employee sa Mandaue City hall ug fashion designer nga mga bayot ang lakip sa 8 ka mga dinakpan sa Centro Police Station sa Mandaue City Police Office, atol sa gihimong’ checkpoint operation.
Gihimo ang checkpoint sa dan A. Soriano, sa Barangay Centro, Mandaue sugod alas 11 Huwebes sa gabii hangtod sa Biyernes, alas 2:00 sa kaadlawon.
JO sa Mandaue
Usa sa mga dinakpan giila nga si Enrique Versoza, 36, taga Barangay Cambaro sa Mandaue, usa ka JO ubos sa Mandaue City Hall ubos sa programa nga Hinabang sa Edukasyon, Livelihood ug Panglawas Sa tanan (Helps) diha sa kabarangayan.
Apan atol sa pakighinabi sa mga tigbalita kaniya, iyang gitug-an nga sa niaging buwan pa sya ni-resign sa pagka-JO ug ni-focus na sa iyang pagka-hairdresser.
Matod ni Versoza nga diha niya ang nakuhang duha ka gagmay’ng pinakete sa shabu, apan iya kadto sa iyang amiga, kinsa maoy iyang kainom niadtong gabhiona ug naggalgal nga manuyop sa Carbon Market sa siyudad sa Sugbo.
Matod niya, manuyupay siya kaniadto apan nihunong na unta.
“Ni-resign gyud ko sa Helps sa miaging bulan pa, kay molarga ko. Sa ako man tong’ amiga, nga nag-una lang nako. Siya nagdaldal nako nga mogamit, kay gikan mi inom,” butyag ni Versoza.
Laing nasikop giila nga si Ramelito Baguio, 42, taga Barangay Dapitan, lungsod sa Cordova, usa ka bayot nga kinsa nakuhaan og duha ka medium pack sa shabu.
Nagdumili magpa-interview si Baguio sa dihang kuhaan kini sa iyang habig.
Nadakpan usab sa mga sakop sa Centro Police Station ang tulo ka managsuon nga nailang si Reysel, 33, Richard, 24, ug Ronald Beroin, 18, kinsa nakuhaan og upat ka paketeng shabu ug drug paraphernalia.
Ang lima ang mga nasikop lulan sa tulo ka taxi sa managlahing oras. Matod ni Police Chief Insp. Aldrin Villacampa, hepe sa Centro Police Station, nga sukad ubay-ubay na ang ilang nasakpan nga mga nanagdala og shabu o marijuana sakay og taxi, hinungdan nga sa checkpoint mohimo sila og random nga pagpahunong sa taxi.
Matod ni Villacampa nga sa dihang gipara, nakita nila nga kadudahan ang lihok sa maong mga dinakpan, hinungdan nga gipagawas sa taxi ug nakita ang dala niining mga kontrabando.
Ang laing tulo nga nasikop nanagsakay og motorsiklo.
Korean National
Samtang, usa ka Koreano ug ang giingong karelasyon niini nga transgender ang gisikop sa kapulisan sa Lapu-Lapu atol sa gihimong drug operation sa Barangay Marigondon, kagahapon sa kadlawon.
Giila ni PCI Jaime Tolentino, deputy sa city intelligence branch sila si Dong Kyoun Kim, 47 ug Jefry dela Peña alyas Diane, 32, dalan Aznar, Barangay Sambag 2, Cebu City.
Si Kim maoy manager sa usa ka condominium building diin siya nagpuyo sa usa sa mga unit niini nga nahimutang sa Sityo Tabay-mabaw, Marigondon, Lapu-Lapu.
Sa inisyal nga pamahayag ni Tolentino nga gipanid-an na nila ang operasyon sa langyaw nga gihulagway nga big time kay dili kini magmantinil og pamaligya og gagmayng pakete ug ilang mga kustomer sagad mga Koreano national.
Nakuha gikan sa mga dinakpan ang duha ka medium pack nga adunay sud nga gituohang shabu nga gibana-bana nga nagkantidad og P94,400, usa ka bundle nga papel nga gipaibabwan og P500 ug P1,000 nga gituohan kita sa shabu.
Apan si dela Peña Nihimakak nga nalambigit siya sa maong transaction, matod pa, igo lang siyang gitawgan ni Kim nga paadtuon sa gipuy-an niini. FVQ ug FMDD, Correspondent