BISAN sa pagsaka sa kaso sa patay sa tibuok Rehiyon 7 tungod sa gihingusgan nga kampanya batok sa illegal nga drugas, nabutang sa numero uno ang Police Regional Office 7 nga adunay labing taas nga crime solution efficiency, matod sa hepe sa PRO 7.
Sa datus nga gipahibawo sa Camp Crame, ang PRO 7 nakakuha og 78.782 percent Crime Solution Efficiency sa over all crime volume sa Index ug Non Index crime.
Nagsunod ang Police Regional Office 1 nga dunay 78.775 ug National Capital Region Police Office nga nakakuhag 76.69 percent.
Sa kinatibuk-an sukad sa Enero hangtod Septiyembre ning tuiga, nakasulbad ang PRO 7 og 28,828 ka mga kaso.
Matod ni PRO 7 Director Chief Supt. Debold Sinas nga di malikayan nga adunay mahitabong krimen ilabi na sa syudad sa Sugbo nga taas ang mga insidente sa kawat ug uban pa.
Apan bisan sa mga insidente sa tulis ug kawat lakip na ang pagpatay, ilang nasulbad ug napasakaan sa kaso ang mga responsabli.
“Kon naa may crime at least we able to solve them. Kon dili man tanan, at least katong pwede i-solve, i-solve gyud to para mogamay ang mga unsolved crimes,” matod ni Sinas.
Iyang gidayeg ang iyang mga sakop nga naghimo sa ilang trabaho ug nagbunga kini pinaagi sa positibong resulta sa pagpangita sa mga kriminal nga nakahimog salaod.
Samtang niubos usab ang crime volume sa tibuok probinsya sa Sugbo og 14.6 porsiento sa tanang krimen gikan sa Hunyo hangtod Septiyembre ning tuiga itandi sa susamang panahon sa milabayng tuig.
Police visibility ang usa sa gituohang hinungdan sa pag kunhod sa tanang krimen sa tibuok probinsya sa Sugbo. AYB