GISUSPENSO sa Maritime Industry Authority (Marina) sa Central Visayas sugod kagahapon ang safety certificates sa duha ka mga barko nga nalambigit sa aksidente sa Lauis Ledge, dakbayan sa Talisay niadtong Huwebes sa gabii diin upat ang nangaangol.
Gibutyag ni Atty. Daniel Martin Oral, public information officer sa Marina 7, nga gipaubos usab sa preventive suspension si Jerome Davalos, ang kapitan sa FastCat M11 ug Jose Joel Gulfan, kapitan sa cargo vessel nga mv Ocean United, samtang nagpadayon ang imbestigasyon sa nahitabo.
Matod niya, si Engr. Marc Anthony Pascua, bag-ong regional director sa Marina 7, ang nimando sa pagsuspenso sa Passenger Ship Safety Certificate (PSSC) sa fast craft ug sa Cargo Ship Safety Certificate (CSSC) sa cargo vessel nga gipanag-iya sa Oceanic Shipping Lines.
Si Oral nipasabot nga samtang suspendido ang usa ka master sa barko dili kini mahimo makaasumir sa katungdanan ug sa mga gimbuhaton isip usa ka kapitan.
“He is not allowed to go onboard any other ship and they need to cooperate in the investigation,” sumala sa tigpamaba sa Marina 7 dihang nahinabi sa Superbalita Cebu kagahapon.
Naospital
Human sa hitabo, tulo ang nangalandig sa tambalanan samtang usa usab ang angol atol sa panagbangga.
Ang insidente natala sa Coast Guard Station Cebu alas 8:45 sa gabii diin gidaro sa MV Ocean United ang MV Fastcat M11.
Sakay sa MV Fastcat M11 ang 70 ka mga pasahero ug 12 ka rolling cargoes.
Gikan sa Sugbo ang Fastcat ug paingon unta sa Tubigon, Bohol diin nibiya kini alas 8:00 sa gabii.
Samtang ang MV Ocean United nga iya sa Oceanic Shipping Lines, gikan sa dunggoanan sa dakbayan sa Talisay nga paingon unta sa pantalan sa Sugbo.
Gipadala dayon sa Philippine Coast Guard (PCG) Central Visayas ang Coast Guard vessel MRRV 4404 dala ang medical team niini.
Samtang gisusi na usab sa Coast Guard Marine Environmental Protection Team inubanan ang coast guard divers aron i-assess kon aduna’y oil spill sa dapit apan negatibo kini.
Samdan sila si Daniel Fuentes, 38; Manuel Veloso Jr., 48; Anacleto Dico Jr., 47; ug si Cary Angelo Bilga, 28.
Matod ni LTJG Michael John Encina, tigpamaba sa PCG Central Visayas, nga stable na ang upat. Padayon pa usab nga gisusi kon unsa’y rason sa panagbangga.
Inspeksyon
Si Oral niingon nga nakalusad na sila og pasiunang inspeksyon ug imbestigasyon kagahapon sa nahitabo, apan palawman pa kini alang sa ihatag nga mga rekomendasyon ngadto sa duha ka habig aron di masubli ang disgrasya. SCG, HBL, REV