MAGSUGOD na karong adlawa ang pinug-anay sa utok sa Cebu Executives and Professionals Chess Association (CEPCA) Boy Pestaño Memorial Open Chess Tournament sa Barracks Chess Club sa Robinsons Galleria Cebu sa North Reclamation Area, dakbayan sa Sugbo.
Ang duha ka mga adlaw nga torneyo, nga gisuportahan sa Jemar Engineering Services, Celjem Construction and Development Corporation, Handuraw, Salon de Rose ug Hale Manna, gipahinungod sa founding president sa CEPCA nga si anhing Boy Pestaño, kinsa usa ka chess columnist sa Sun.Star Cebu ug Superbalita.
Mao kini ang sentro sa kasaulogan sa ika-28 ka mga tuig nga anibersaryo sa CEPCA, ang labing dugay nga asosasyon sa chess sa Sugbo.
Ang guest speaker sa opening ceremony mao si Cebu City councilor Atty. Sisinio Bebs Andales, kinsa usa ka founding member ug officer sa CEPCA. ESL