NABUNYAGAN og kapildihan si LeBron James sa labing una niyang pagduwa isip usa ka sakop sa Los Angeles Lakers batok sa hosts Portland Trail Blazers, 128-119, kagahapon sa National Basketball Association (NBA).
Gisugdan ni James ang iyang kampanya sa Lakers pinaagi sa duha ka sunodsunod nga makapaukyab nga mga hansak apan wala sila nakalahutay sa maayong gipakitang duwa sa Trail Blazers hilabi na sa 4th quarter.
Ang four-time MVP mipasabot nga naa pa sila sa proseso nga magkasuwetuhay sa usa’g usa ug daghan pa silang angayang makat-unan isip usa ka puwersa aron maabot ang gilauman gikan kanila.
“It’s not instant oatmeal. It’s not that fast. It takes some time to get that chemistry where you can just close your eyes and know exactly where guys are,” pasabot ni James, kinsa maoy nangulo sa Lakers pinaagi sa iyang 26 puntos ug 12 rebounds.
Sa paghiabot ni James sa Lakers, gilauman na dayon nga mahibalik ang kalig-on sa puwersa sa multi-titled Lakers nga kanunayng nagkagidlay sa miaging lima ka mga tuig.
Gawas kang James, gipangkuha sa Lakers ang laing mga beterano nga sila si Rajon Rondo, JaVale McGee, Lance Stephenson ug Michael Beasley aron makagiya sa batan-on nilang puwersa nga gilangkuban nila ni Brandon Ingram, Lonzo Ball, Kyle Kuzma, Josh Hart ug rookie Moe Wagner.
Kon adunay dakong kausaban sa puwersa sa Lakers, lahi ang esena sa kampo sa Trail Blazers gumikan kay mingbalik sila og duwa nga kompleto gihapon ang ilang starters nga naglakip nila ni Damian Lillard, CJ McCollum ug Jusuf Nurkic.
Gipangulohan ni Lillard ang trail Blazers pinaagi sa iyang 28 puntos samtang nidugang og 24 puntos si Nik Stauskas.
Ang kadaugan gipahinungod sa Trail Blazers ngadto sa tag-iya sa team nga si Paul Allen, kinsa mipanaw sa laing kalibutan ning bag-uhay lang sa edad nga 65.
“We wanted to come out and start the season right and to honor our owner, Mr. Paul Allen. That’s what tonight was all about for us, not about the noise surrounding the game,” matod ni Lillard.
Sa pagpangulo ni James, kinsa four-time MVP, ang Lakers sayong nakapainit sa ilang opensa ug nakaposte kini’g 25-15 nga labaw.
Apan sa pagpangulo nila ni Lillard ug Staukus, ang Trail Blazers hinayhinay nga nakakamang hangtod nga naangkon nila ang kadaughan sa hingpit.
Sa maayo niyang gipakita, si Staukus nakadawat og mga pagdayeg gikan sa iyang mga kauban.
“He really got in a groove and the guy can shoot, we’ve seen it in practice,” asoy ni Portland coach Terry Stotts kabahin kang Stauskas.
“I was really happy for him to start the season like that with a new team. The shots that he made were all in the flow of the offense.” AP, ESL