PADAYONG gipangita ang mga suspetsado sa budol-budol human nga gilimas ang alahas sa us aka 71-anyos nga babaye niadtong Biyernes, Oktubre 19, sa Gusa Highway, dakbayan sa Cagayan de Oro.
Ang nabiktima naila nga si Martian Torres, balo, nga taga Barangay Gusa ning dakbayan samtang ang mga suspetsado giingong tulo ka mga babaye ug usa ka lalaki nga kasamtangang gipangita pa human sa panghitabo.
Matud sa biktima nga samtang anaa kini atubangan sa usa ka ospital kalit lang nga miduol ang usa ka babaye ug nakig-estorya ngadto kaniya ug naghisgot sa iyang anak nga babaye.
Giingong nagduda na kini sa babaye apan sa kadugayan nadala kini sa mga maanindot ug makadani nga mga pulong sa suspetsado.
Laing babaye na usab ang miduol sa ilang nahimutangan ug naghisgot og mga negosyo.
Nakita usab niini ang laing lalaki nga sakay sa sakyanan ug giingnan kini sa usa ka babaye nga ipahubo ang tanan niini nga mga alahas ug isulod sa envelope.
Nagkasinabot usab sila nga mangaon sa usa ka fastfood chain apan nag-usa na lamang ka oras wala na nipatim-aw ang mga suspetsado hinungdan nga nagduda na kini nga nabiktima sa budol-budol.
Nadala sa mga suspetsado ang iyang kwentas nga mikantidad og P20 mil ug ariyos nga P6 mil.
Ang panghitabo padayon pa nga gi-imbestigahan sa kapolisan sa Police Station 3 sa Agora.