MAGTIGI sa umaabot na 2019 Mid-term Elections si Misamis Oriental Vice Governor Joey Pelaez ug ang anak ni Misamis Oriental 1st District Congressman Peter Unabia nga si Christian Unabia.
Dako ang kumpiyansa ni Pelaez atol sa pakighinabi sa mga sakop sa prensa nga ang iyang kasinatian sa pagpanerbisyo dako og labaw kon itandi kang Unabia nga wala pay kasinatian sa panerbisyo ug bata pa usab.
“Kung walay kwartahay daog nako. Of course, I am highly educated and I have vast experience by far in public service and in any aspect,” matud ni Peleaz, kinsa midugang nga iyang hatagan og pagtagad ang unang distrito nga giingon niini nga napasagdan sa kongresista.
“First district is really underserved and needs a lot of help and I will perform as congressman. I think I can bring projects, I can file bills, laws, health, national importance, my favorite sector the school and school children, plus I think I will be able to have more, more infrastructure, livelihood, projects for environment, youth development and programs for senior citizen, I know I can be very active,” pahayag ni Pelaez.
Gipasabot sab niini nga aduna siyay mga pangandoy sa unang distrito ug ngani naibog siya sa mga proyekto sa 2nd district ubos ni Congressman Juliette Uy.
Samtan si Christian Unabia sa iyang bahin, mibutyag nga masaligon kini sa mga supporters sa iyang amahan ug dili basihan kung unsa ka propesyunal ang usa ka tao aron makapanerbisyo sa katawhan.
“Ngano man kung motabang diay ka sa katawhan kailangan gyod diay propesyunal? Kung naay kasing kasing ang tao nga motabang dili bana siya madawat sa katawhan?” reaksyon ni Unabia sa pahayag ni Pelaez batok kaniya.
“Gasalig ko nga ang supporters sa akong father, intact. Ako ang tingog sa kabatan-onan ug matabangan ang kabus nga mga kaigsuonan. Naa nakoy nahuna hunaan nga balaodnon.” dugang niini.
Usa sa nakapaaghat kang Unabia pagpapili sa umaabot eleksyon mao nga buot niini nga mapadayon ang programa nga nasugdan na sa iyang amahan kinsa anaa na sa katapusang termino niini.