MisOr guv dili tumpangan si Uy

CAGAYAN DE ORO. Governor Bambi Emano ug kanhi Villanueva mayor Julio Uy magtigi pagka gobernador sa Misamis Oriental sa umaabot piliay 2019. (Steph V. Berganio)
CAGAYAN DE ORO. Governor Bambi Emano ug kanhi Villanueva mayor Julio Uy magtigi pagka gobernador sa Misamis Oriental sa umaabot piliay 2019. (Steph V. Berganio)

GIRESPETO ni Misamis Oriental Governor Yevgeny Vincente Emano ang katungod sa bisan kinsa nga moatbang kaniya sa umaabot 2019 Mid-term Elections.

Atol sa katapusang adlaw sa pagduso sa certificate of candidacy niadtong Oktubre 17 sa buhatan sa Provincial Commission on Elections (Comelec), miduso si kanhi Villanueva mayor Julio Uy ubos sa National Unity Party aron magpapili sa pagka-gobernador.

Pagkahapon sab niadtong adlawa, miduso si Emano sa iyang candidacy aron magpasubli isip gobernador alang sa iyang katapusang termino.

Si Uy ug Emano maoy magtigi sa maong posisyon karon umaabot piniliay.

“Katungod man niya nga iya kong hagiton, lisod man motumpang kay ang gitudlo sa akong mga ginikanan dili mi mosukol sa mga magulang kanamo,” matud ni Emano.

Gipasabot sab niini nga adunay mga pagsuway nga mag-alyansa nalang unta alang sa kalambuan sa probinsya apan daw wala kini nahitabo.

Gitubag sab ni Emano ang gibato sa kampo ni Uy nga daw pulos lamang pamolitika ang gihimo sa partido PaDayon Pilipino ug labina gyod sa pamilyang Emano.

“Bisan sa kapobrihon sa Padayo Pilipino nakadaog man ta ug daghang ganti, bisan sa atong kapobrihon P570 milyones ang nasemento nga dalan karon lang nga tuig, Nakatabang sa 19,000 ka mga Iskolar sa IKNB, nakagama ug 40 ka kooperatiba ug nakatunol sa P7 milyones sa mangingisda ug mag uuma, nakapanghatag kita ug mga multicab, nakahatag mi ug P300,000 alang sa Brgy. Empowerment program, nakapatindog ug skwelahan, covered court ug uban pa. Ang pangutana asa ang pamolitika niana?” matud ni Emano.

Sa bahin ni Uy aminado kini nga ikaduha na kini niyang pag-atbang ni Emano ug gipasabot nga taud-taod na ang pagdumala sa mga Emano nga angayan na usab sulayan ang pagserbisyo sa uban.

“Ang punto ko man lang nga nakita na sa katawhan unsay matang sa ilang serbisyo, health and social services unsay ilang nahimo nga mga proyekto para sa kalamboan nato so kung gusto ang katawhan ug wala sila ma satisfy sa ilang serbisyo so gi-offer nato atong kaugalingon nga pwedeng sulayan sa katawhan. Kay kung dili sab sila ganahan pwede raman ko hulipan,” pahayag ni Uy ug miingon nga daw iyang nakita nga mas mipokos sa pulitika ang Emano kaysa tinuoray nga serbisyo.

“Usa akong nakita nga mas pokos sila sa pulitika kaysa tinuoray nga serbisyo sa katawhan, ilang abilidad maayong laki sa pulitika. Dugay-dugay na ang mga Emano nagdumala sa lalawigan busa naghangyo kita sa katawhan nga sulayan kita para makita ug matandi ang serbisyo para sa kalamboan sa probinsya,” dugang ni Uy.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph