HUGOT nga gikondena sa Kilusang Magbubukid ng Pilipinas KMP-Northern Mindanao ang pagkasikop sa laing mag-uuma human gisilbihan og warrant of arrest niadtong Miyerkules, October 16, sa lungsod sa Balingasag, Misamis Oriental.
Nadakpan si Alfredo Abao, sakop sa Balingasag Farmers Association sa probinsya sa Misamis Oriental, human lakip kini sa 30 ka laing mga kaubang mag-uuma nga giakusahan og murder ug frustrated murder.
Una na nga nasikop sila si Jerry Basahon sa Misamis Oriental Farmers Association (Mofa) ug si Women’s Rights Advocate Merlita Dorado nga sakop sa Gabriela-Misamis Oriental.
Si Basahon ug Dorado maoy gipasanginlan nga nalambigit sa pagpangatake sa Binuangan Police Station niadtong December 3, 2017.
Matud sa KMP nga ang pagkasikop sa mga mag-uuma daw usa ka taktika ni Presidente Rodrigo Duterte nga pahilumon ang mga kritiko ug mga nagpaluyo ug nagsuporta sa mga tawhanong katungod sa lalawigan.