PATAY dihang nahidangat sa tambalanan ang usa ka drug suspek nga giingong namusil sa kapulisan atol sa drug bust niadtong Biyernes alas 2 sa kadlawon sa Purok 11, Gusa, dakbayan sa Cagayan de Oro.
Ang napatay naila nga si Wilmark Maestre, alyas “Tutos,” ug residente sa Saint John, Puntod ning dakbayan kinsa giingong anaa sa listahan sa mga otoridad nga nalambigit sa ilegal nga druga.
Kini atol sa gipahigayon nga drug bust sa kapolisan sa Police Station 3 (PS3) sa pagpangulo ni Police Senior Inspector Jason Sto. Domingo.
Giingong sa dihang nakuha na ni Maestre ang drug bust money nga P1,000 nakamatikod kini nga pulis ang gikatransaksiyon niini hinungdan nga mibunot sa iyang kalibre .38 nga armas ug mipusil sa poseur buyer.
Swerteng wala kini maka-igo hinungdan nga napugos ang kapolisan sa pagpusil sa suspek rason nga nakaangkon og samad pinusilan nga miresulta sa iyang hinanaling kamatayon.
Dali pa nga gidala sa Northern Mindanao Medical Center (NMMC) si Maestre apan patay na kini sa dihang nahidangat sa tambalanan.
Nakuha gikan sa suspek ang gituohang shabu, marijuana, kalibre .38 nga armas nga adunay bala ug personal nga mga gamit.
Ang mga ebidensiya kasamtangang anaa sa Regional Crime Laboratory 10 samtang ang patay nga lawas anaa sa morgue sa NMMC.