Binasi sa Isaias 53:10-11; Salmo 33; Hebreo 4:14-16; Marcos 10:35-45
KON magkapundok na gani ang barkada sagad magtagayay na dayon. Bûbòan ang usa ka baso unya ilibot kini sa mga kauban ug imnan nila. Di madugay may mga mahimong hilom ug mahimong sabaan. Magsinugsogay dayon. Usahay sad, itanyag ang baso sa moagi, nga dikaila, aron paimnon. May mobalibad. May modawat. Usahay sad gubot ang dangatan kay may dili magpabalibad. Simbolo ang tagay sa panghigalaay ug sa alegre. Mahimo sang simbolo sa kinabuhi nga lulinghayaw ug mapasagaron.
Mas seryoso ang gipasabot sa tagay ni Jesus: “Makahimo ba kamo pag-inom sa kupa nga akong imnon, o pagpabunyag sa bunyag nga ako bunyagan?” Gisulti niya kini sa managsuong Santiago ug Juan nga nangayo kaniya og pabor: “Itugot kanamo nga sa imong himaya molingkod kami usa sa imong tuo ug usa sa imong wala.” Nangambisyon sila.
Apan wala iwakli ni Jesus ang maong tinguha. Iya lang kining gibutang sa insaktong perspektibo. Ang kupa nga iyang pagaimnon ug ang bunyag nga iyang pagadawaton mao ang iyang umaabot nga pag-antos ug pagkamatay sa krus. Gitanyag niya kini ngadto kanila. Ug midawat sila bisan tingali wala gyod nila masabti kon unsay gitanyag ni Jesus kanila. Hinuon, wala gihapon niya sila saari sa himaya nga ilang gipangayo: “Apan ang paglingkod sa akong tuo o sa akong wala dili akô ang paghatag apan alang lamang niadtong gitagaan niini.”
Makab-ot ra gyod diay ang himaya pinaagi sa pag-antos. Mao kini ang gitagay ni Jesus sa iyang mga tinun-an. Gani kining maong pag-antos masugdan na sa buhi pa ang tawo pinaagi sa pagpaubos ug pagpangalagad: “Si kinsa nga buot mahimong dako diha kaninyo, magpakahimong inyong alagad; ug si kinsa nga buot mahiuna diha kaninyo magpakahimong sulugoon sa tanan.” Ang modelo sa sulugoon ni Jesus mao si Jesus mismo: “Kay ang Anak sa Tawo wala mianhi aron alagaran apan aron pag-alagad ug pagtugyan sa iyang kinabuhi isip tubo alang sa kadaghanan.”
Sumala ni propeta Isaias ang daghan himuog tarong sa Alagad sa Dios pinaagi sa iyang pag-antos. Matuman ang kabubut-on sa Ginoo nganha kanila tungod sa paghalad sa maong alagad sa iyang kaugalingon alang sa ilang kasal-anan. Nakab-ot pinaagi sa pagtagay sa maong alagad sa iyang kaugalingon ang panaghigalaay tali sa Dios ug sa tawo.
Gipaklaro pa gyod kini sa sulat ngadto sa mga Hebreo. Bisan pag walay sala si Jesus, sa iyang pag-antos nakasimpatiya siya sa mga kahuyang sa tawo ug kita makaduol na sa trono sa grasya aron madawat ang kaluoy sa Dios. Mao kini ang labing hingpit ug nindot nga pagtagay. Gawas kini sa sala kay ang gipaambit kaayo ug kaluoy lamang sa Dios.
Maninguha gyod kitang managalawat panahon sa Santo nga Misa kay niining paagiha miambit kita sa Dios nga nagpakatawo aron kita moambit sa iyang pagkaDios.