Nalzaro: Isyo sa edad ug panglawas

BASTA eleksiyon, anything goes. Bisan unsa na lang ang himuon sa mga pulitiko aron lang maka-lamang o maka-bentaha lang sa ilang mga ka-atbang. Usahay maapil na ang mga personal nga mga isyo sa mga kandidato. Apil na ana ang mga kabit, babaero, sugarol, bayot, kurakot o bisan unsa na lang. Usahay gani maapil man ang mga sakop sa pamilya bisan walay labot sa pulitika.

Posibleng motumaw unya ang isyo kabahin sa panglawas ug edad sa mga kandidato labi pa kadtong medyo edad-edaran na og kadtong adunay sakit nga gihambin. Kay kining pulitika ra ba makabuhi og patay. Bisan kadtong nagbaston ug nangsangkiig na mo-apil gihapon. Sama god ni Senador Juan Ponce Enrile nga bisan 94 anyos na, magpapili gihapon isip senador. But infairness, bisan edaran na si Enrile ug luya na ang lawas, nagpabiling lantip ang huna-huna. Wala pa ma-alzheimer.

Diri sa dakbayan sa Sugbo, masakiton kining ‘kanhi laos nga pulitiko’. Nagtakin naman gani na og urine bag. Aw, ma-apil gyud na sa isyo sa kampaniya. Sa lalawigan, medyo edaran na si Vice Mayor Agnes Magpale. Apan matod pa niya nga baskog gihapon siya ug lig-on pa ang tuhod. Pero mas batan-on ug lig-on pa si Gwen.

Si Talisay City Mayor Eduardo Gullas, kinsa milansar pagka-kongresista sa first district, edad-edaran na usab. Pero dili pa hinuon agakon. Apan dili na tanto makadungog. Matulog na man gani kon magpa-presscon. Pero nagpabilin gihapon ang kalantip sa huna-huna ni Eddiegul. Mao usab ang kahimtang sa panglawas ni Toledo Mayor Sonny Osmea, kinsa molansar sa pagka-kongresista sa third district. Iyang ika-atbang sila si Atty. John Pablo Garcia ug Dr. Geraldine Yapha nga mga batan-on pa.

Si kanhi south district Congressman Tony Cuenco, molansar sa pagka-konsihal sa dakbayan sa Sugbo ubos sa Barug-PDP Laban. Kaya pa man daw ni Tony. Samtang si Arturo ‘Boy’ Radaza, kinsa nagbaston na gumikan sa sakit sa iyang tuhod, mobalik sa pagka-mayor sa dakbayan sa Lapu-Lapu. Sa dihang gipangutana siya kon kaya pa ba? Siya nagkanayon nga tuhod ra ang iyang deperensiya. Ang iyang utok ug kasing-kasing, kaya pa. Aw, still fighting pa man kaha? Hala kumbati. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph