MATOD ni Cebu City Mayor Tomas Osmeña nga iyang ipatuman kon mahimong balaud kining pagdili sa mga tawo sa pagpanag-iya og sakyanan kon way parking area.
Si Senador Sherwin Gacthalian niduso og balik sa iyang balaudnon sa Senado alang niining mao nga lakang.
Matod ni Osmeña nga ang pagpanag-iya sa mga tawo og sakyanan bisan wa silay parking area usa sa mga nakaingon sa paghuot sa trapiko dinhi sa dakbayan.
Pastilan, bisan tuod kon usa sa mga hinungdan sa kalisod sa mga bombero sa pagsulod sa mga dapit nga nasunogan mao ang pagbabag sa mga sakyanan nga gi-park sa kadalanan, di kini maoy usa sa mga dakong hinungdan.
Ang numero unong hinungdan mao ang kadaghan sa mga sakyanan, apan wa makadako ang kadalanan ug wa say bag-ong mga dan nga nabuksan. Klaro nga ang mga karsada wa makasustenir sa gidaghanon sa bul-og sa mga sakyanan nga mag-agian kada adlaw.
Laing hinungdan mao ang kakuwang sa disiplina sa mga drayber ug kakuwang og political will sa mga namunoan sa kanunay nga pagpatuman sa balaud sa trapiko.
Sama unta sa iyang nasugdan na sa pagpatuman nga kampanya batok sa counter flow. Maanindot na unta ang iyang kampanya ug kinabag-an ang nakadayeg, apan napawong ug nahunong ra sab kini. Karon, anam-anam na sab nga misiaw ang counter flowing sa mga sakyanan, labina sa mga nagmotorsiklo ug nag scooter.
Samtang wa pa mapadak-i ang mga karsada ug napatuman ang mass transport system nga gilalisan pa hangtod karon, mas dali untang mahimong lakang ni Osmeña mao ang higpit nga pagpatuman sa mga balaud sa trapiko sa ingon madisiplina ang abusadong mga drayber sa kadalanan.
Kana, mas epektibo pa ni sa pagpagaan sa suliran sa trapiko sa Metro Cebu, kay sa nianang pagdili sa mga tawo sa pagpanag-iya og sakyanan nga way garahianan.