DAGHAN ang magsige og pangutana nako kon magsige pa ba ko og bike. Akong gitubag nga weekend ra ko maka biseklita tungod sa demand sa trabaho. Di na sab ko tigsikad sa Cebu City proper, apil na sa Busay nga maoy melting pot sa mga siklista kon weekedays.
Usa ra ang akong katarungan, ang grabeng traffic. Laliman ka makig ilog ka og agianan sa mga motorsiklo ug scooter gikan sa amoa hangtod sa eskina sa may IT Park unya usban na sab diri sa may JY Square. Samtang nagsakay ang akong asawa angkas nako sa scooter, mao usab ni ang among gihisgutan, gitandi ang kahimtang sa trapiko ang kaniadto ug karon. Lahi na kaayo ang gidaghanon sa mga sakyanan.
Mao ni ang rason nganong mas ganahan ko sa Guba, Paril ug Mabini area ko magsikad sikad kay sa siyudad. Lahi ra sa bukid, labina kon weekdays, kay di kaayo daghan ang mga sakyanan nga manaka. Sagad, naa ra sa siyudad. Mao ni ang akong naobserbahan matag saka nako sa weekdays. Mingaw ang kabukiran kon mga sakyanan ang hisgutan.
Lahi usab ang mga talan-awon sa kabukiran kay berde, mas presko ang hangin ug di ka mahadlok sa agianan kay way mga taxi ug v-hire, kansang mga drayber magpataka lang sa pagpadagan. Way kukahadlok nga makaigo. Ngilohan ko magtan aw sa ilang dung nga pila na lang ka dangaw ang gilay-on gikan sa sakyanan nga gisundan.
Interval
Dunay mga pagtuon kabahin sa epekto ug benepisyo sa pag ehersisyo. Sa usa ka literature nga akong nabasahan, ang benefit diay sa exercise mo-last lang og pipila ka mga adlaw, mao nga importante nga mas maayong kanunay nimo ning buhaton.
Kon ikaw usa ka atleta, mahanaw ni at least 3 days. Apan di usab maayo nga kanunayon ang pag-exercise og heavy. Kinahanglan nga dunay gaan, igo-igo ug bug-at. Sa usa ka laing lapad nga pagtuon, ang pag exercise og 30 minutos igo na kaayo nga dunay impact sa imong panglawas.
Masakit pud
Duna nay mga higayon nga nisikad ko unya naabtan og uwan sa kadalanan ug kabukiran. Makadaghan na ko mahiuli nga basa sa uwan. Diha pay higayon nga gauwan sa bukid unya pag abot sa ubos naglagiting ang kainit. Wa ko masakit niadto.
Apan kana diayng masakit ka, usa na sa timailhan nga nasobrahan ka ra sa pasingot ug exertion sa imong lawas. Timailhan o sinyal na sa imong lawas nga papahawayon sab ka. Naluya ang imong lawas busa luya sab ang imong immune system. Tanang masobrahan, di maayo.