Mga duwa karon
4:30 pm- Rain or Shine batok Meralco
7:00 pm- Blackwater batok Alaska
MOSUWAY pagkuha og bahin sa liderato ang Alaska Aces ug Blackwater Elite sa ilang panagharong karong gabii sa main game sa Philippine Basketball Association (PBA) Governor’s Cup sa Araneta Coliseum.
Ang duha ka mga kampo kasamtangang nagbahin sa ikatulong luna nga parehong naggunit og 6-2 nga rekord.
Ang modaog ning maong engkuwentro makig-uban sa Magnolia Ang Pambansang Manok ug Brgy. Ginebra Gin Kings sa ibabawng bahin. Ang Hotshots ug Gin Kings kasamtangang nagbahin sa liderato nga pulos adunay 7-2 nga rekord.
Ning puntoha, parehong nagkinahanglan ang Aces ug Elite nga makadugang og kadaugan aron moamag og samot ang ilang poruhan sa inilugay og luna sa top 4.
Ang mopatigbabaw nga upat human sa single round elimination mao ang makapanag-iya og twice-to-beat nga bintaha sa quarter-finals diin magparang ang No.1 team batok No.8, No.2 batok No.7, No.3 batok No.6 ug No. 4 batok No.5.
Sa premirong duwa, mag-abot ang parehong mamasin nga makakumpayot pa sa inilugay og luna sa quarter-finals nga mao ang Meralco Bolts ug Rain or Shine Elasto Painters.
Ang Bolts kasamtangang nagbitay sa ikasiyam nga dapit dala ang 3-6 nga rekord samtang nagsunod sa ika-10 nga luna ang Elasto Painters nga adunay 2-5 nga baraha.
Pareho na man tuod silang wala’y poruhan nga makasulod sa top 4 apan puwedeng pang makakawat og puwesto ang Bolts ug Elasto Painters sa magsunod nga upat ka mga luna alang sa quarter-finals.
Lakip ning kombatiha, ang Bolts aduna pa’y nahabiling tulo ka mga duwa samtang lima pa ang nahabilin sa Elasto Painters. ESL