HUMAN sa usa ka dekada, nakasulod pagbalik sa finals ang University of San Jose Recoletos (USJ-R) Jaguars pinaagi sa pagdispatsar og sayo sa University of San Carlos (USC) Warriors, 80-66, sa semi-finals sa Cebu Schools Athletic Foundation Inc. (CESAFI) basketball college division sa Cebu Coliseum.
Apan dili sayon ang naagian sa Jaguars una sila nakataak sa finals sa labing unang higayon gikan niadtong 2008 gumikan kay kinahanglan pa nilang mobangon gikan sa 20 puntos nga pagkalubong sa 2nd quarter.
Gipangulohan sa kasamtangang MVP nga si Jaybie Mantilla ang pagbangon sa Jaguars pinaagi sa pagpaulbo og sunodsunod nga three-point shots nga maoy nakapahak sa dakong labaw sa Warriors ngadto sa walo na lang ka mga puntos, 37-45, sa halftime.
Human giinat og balik sa Warriors ang ilang labaw ngadto sa 47-37, pagsugod sa 3rd quarter, ang Jaguars ningpabulhot na sab sa ilang opensa hangtod nga naangkon nila sa labing unang higayon ang labaw, 52-51, sa nahabiling 2:23 minutos.
Wala na buhii sa Jaguars ni rookie coach Leodie Garcia ang maong labaw hangtod na sa katapusang gutlo.
Gipangulohan ni Mantilla ang kadaugan pinaagi sa iyang 22 puntos lakip na niini ang lima ka three-point shots, nidugang og 13 puntos si Miguel Gastador samtang ningtampo og 12 puntos matag usa sila si import Tochukwu Ewenike ug John Ubalde.
Sa high school division, mag-abot sa finals ang defending champions University of the Visayas (UV) Baby Green Lancers ug University of Cebu (UC) Baby Webmasters human nila gipangdispatsar sab og sayo ang ilang tagsatagsa ka kontra sa semi-finals.
Gipanglampornas sa Baby Green Lancers ang USJ-R Baby Jaguars, 76-62, ug mao sab kini ang gibuhat sa Baby Webmasters ngadto sa University of Southern Philippines Foundation (USPF) Baby Panthers, 89-65. ESL