NAKAKAPLAG og talagsaong bayani ang back-to-back champions Golden State Warriors sa ilang kulbahinam nga kadaugan batok sa host Utah Jazz, 124-123, kagahapon sa National Basketball Association (NBA).
Gitumbok mao ang reserbang magduduwa nga si Jonas Jerebko, kinsa nakapasulod og tip in shot sa nahabiling 0.3 segundo aron agakon ang Warriors sa ikaduha nilang sunodsunod nga kadaugan.
Si Kevin Durant, kinsa maoy nangulo sa Warriors pinaagi sa iyang 38 puntos, nasipyat sa iyang running jumper ug maayo na lang kay nakapuwesto og sakto si Jerebko alang sa iyang nakapadaog nga tip in shot.
Grabe ka tam-is kini nga kadaugan alang kang Jerebko batok sa puwersa nga mibuhi kaniya hinungdan nga nahimo siyang free agent sa miaging season.
Si Stephen Curry niamot og 31 puntos alang sa Warriors, nidugang og 14 puntos si Draymond Green, nihatag og 12 puntos si Klay Thompson samtang niamot og 10 puntos si Jerebko.
Ang Jazz gipangulohan ni Joe Ingles pinaagi sa iyang 27 puntos samtang nidugang og 19 puntos si Donovan Mitchell.
Sa laing gikaintapang duwa, nagpakatap og 31 puntos si Kawhi Leonard aron agakon ang Toronto Raptors sa impresibong kadaugan batok sa gikahadlukang puwersa sa Eastern Conference nga mao ang Boston Celtics, 113-101.
Gipakita ni Leonard nga aduna gihapon siya’y bikabuga bisan tataw nga wala pa nahibalik ang iyang siyento porsiyentong kondisyon gumikan sa taas nga panahon nga wala siya nakaduwa.
Si Leonard, kinsa nalimitahan lang og siyam ka mga duwa dihang sakop pa siya sa Spurs sa miaging season tungod sa angol sa iyang paa, niposte sa ikaduha niyang sunodsunod nga double-double performance isip usa na ka Raptor.
Nakatali si Leonard og 10-of-25 shooting lakip na niini ang duha ka three-point shots ug perpektong siyam ka freethrows.
Gipasabot ni Leonard nga wala siya maghunahuna kon unsa’y iyang abilidad kaniadto nga nakapahimo kaniyang kampiyon, Best Defensive Player ug Finals MVP tungod kay nagtutok lang siya kon unsa’y iyang ikatampo sa Raptors.
“I’m not looking to get back to where I was before,” matod ni Leonard. “I’m worried about the now and the player I’m trying to become now and tomorrow.”
Mismong ang coach sa Celtics nga si Brad Stevens nakadayeg og maayo sa gipakitang duwa ni Leonard.
“No matter who Kawhi was against, Kawhi was doing well,” batbat ni Stevens.
Maayo sab nga nakaduwa alang sa Raptors mao si Serge Ibaka, kinsa niamot og 21 puntos alang sa kadaugan samtang niamot og 15 puntos si Kyle Lowry.
“That’s a good home win right there,” batbat ni Raptors coach Nick Nurse.
Ang Celtics gipangulohan ni Kyrie Irving pinaagi sa iyang 21 puntos, nihatag og 16 puntos si Jayson tatum, niamot og 14 puntos matag usa sila si Al Horford ug Gordon Hayward samtang nitampo og 13 puntos si Jaylen Brown.
“Tonight was a great test for us. We just came up short,” matod ni Irving. AP