2 kanding, manok sa ‘wanted’ giihaw sa mga pulis?

KORONADAL CITY -- Nagpaabot karon og pormal nga reklamo ang pamilya sa giingong suspek sa warrant of arrest sa kapulisan sa lalawigan sa South Cotabato.

Kini human nga mireklamo ang usa ka Merfe Andres ngadto sa Surallah Municipal Police Station nga gironda sa mga pulis ang ilang balay sa Barangay Upper Sepaka, Surallah niadtong Oktubre 14 tumong aron dakpon ang iyang bana nga si Tirso.

Apan niadtong tungura, wala ang magtiayon sa ilang gipuy-an gumikan nangadto sila sa ilang paryente sa Barangay Talisay, Lake Sebu sa maong probinsiya.

Matud pa, adunay nagsulti ni Merfe nga naay mga pulis sa ilang balay hinungdan nga dali kining mipauli.

Apan dihang nasugatan niini ang raiding team, nakita niini nga nagdala kini og duha ka balde nga dunay sulod nga karne sa duha ka kanding ug mga manok nga binuhi sa magtiayon nga ilang giihaw.

Sa diha nga gipangutana ni Merfe ang mga pulis nganong giihaw ang iyang duha ka kanding ug mga manok, giingong igo lang mitubag ang kapulisan nga apil kadto sa warrant of arrest dalang katawa.

Matud ni Merfe nga walay problema nga dakpon ang iyang bana nga dunay kaso nga murder ug cattle rustling apan reklamo niini nganong giapil ang iyang mga binuhing kahayupan.

Gipasalig ni Senior Superintendent Nestor Salcedo, South Cotabato Police Provincial Office director, nga paimbestigahan niya ang mga pulis ug ang pamilya sa mga nagreklamo aron mogawas ang kamatuoran.

Gipasalig kon mapamatud-an nga sad-an, dili magpanuko si Salcedo nga silutan ug pasakaan og tukmang kaso ang nalambigit nga mga pulis. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph