NAGMALAMPUSON ang gilusad nga Media Shootfest sulod sa Armscor shooting range sa Catitipan, dakbayan sa Davao, Sabado sa hapon, Oktubre 20.
Mokabat ngadto sa usa ka gatus ka mga sakop sa media ang nagpatisipar diin una sila tugutan nga makapabuto og armas ipailawom una sila sa oryentasyon sa paggunit niini.
Gipasabot ni Police Chief Superintendent Marcelo Morales, director sa Police Regional Office (PRO)-Davao nga importante nga makabalo ang mga sakop sa media sa paggamit og armas aron nga kaya nilang panalipdan ang ilang kaugalingon atol sa emerhensiya ilabi na og dunay hulga sa ilang kinabuhi.
“Malaking bagay ang matuto kang magtanggol sa iyong sarili,” pasabot ni Morales.
Samtang gibati og kalipay ang mga sakop sa media sa oportunidad nga gihatag ngadto kanila sa mga nagpasiugda sa maong aktibidad.
Gawas niini, duna say raffle nga nahitabo atol sa aktibidad diin t-shirt ug cash ang nadaugan sa mga misalmot. (Richy Nalagon)