Kanhi sundalo nga asset sa PDEA gi-aresto

NASIKOP sa hiniusang puwersa sa Davao City Police Office (DCPO) ang usa ka kanhi sakop sa Scout Ranger kinsa giingong kanhi sab asset sa Philippine Drug Enforcement Agency (PDEA) sa Iloilo.

Ang pag-aresto sa suspek nga giilang si Levi Brocamante Bawe, 39, nahitabo niadtong Biyernes sa gabii, Oktubre 19.

Sumala ni Police Senior Superintendent Alexander Tagum, city director sa DCPO, nga nadakpan si Bawe sa San Pedro, Fatima Vilage, Matina Aplaya, ning dakbayan kon diin temporaryo siyang nanimuyo, uban sa iyang asawa nga gidakop usab gumikan sa kasong estafa.

Gidakop si Bawe ubos sa warrant of arrest tungod sa kasong pagpatay nga gipagula sa hukmanan didto sa Iloilo.

“Dati 'yan sya na scout ranger tapos nag-awol and then dati rin na asset ng PDEA sa Iloilo,” tin-aw ni Tagum.

Gikonsidera ang suspek nga usa ka high-value target gumikan sa alegasyong nalambigit kini sa ilegal nga druga ug kanhi usa ka sakop sa militar.

Samtang gikanayon ni Police Chief Superintendent Marcelo Morales, director sa Police Regional Office (PRO)-Davao, nga mas pakusgan pa sa iyang mga sakop ang pagdakop sa mga kriminal nga pinangita sa balaod.

“One less criminal, one less crime in the society,” pagpasabot ni Morales ngadto sa mga tigbalita.

Hinuon gilimod sa dinakpan nga nalambigit siya sa ilegal nga druga, apan miangkon nga duna siyay warrant of arrest gumikan sa kasong murder.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph