WA namulitika ug wa’y gibabagan nga programa diha sa Mandaue City hall.
Kini ang giklaro sa kampo sa mga konsehal nga giilang oposisyon karon.
Kini human nga unang gitug-an ni Bise Mayor Carlo Fortuna nga ni-inhibit ang maong mga konsehal sa paghatag og pagtugot kang Mayor Luigi Quisumbing alang sa himuong legal nga aksyon kalabot sa kontrobersyal nga 3.5 ektaryang luna sa Barangay Looc.
“Wa gyud mi gibabagan. Gani we don’t have any intention to do that. Whatever it is nga gustong buhaton sa Siyudad, for as long as we believe that it is for the benefit of the majority, we will be more than willing to toe the line. Pero ingon ato nga sitwasyon, I apologize. Sakto lang gyud to among gibuhat, nga gituman namo ang gi-advice ni Vice Mayor Carlo sa amo,” pagpaklaro ni Konsehal Carmelino ‘Jun’ del Mar.
Dugang ni del Mar, nga tinguha unta sa ilang kampo sa oposisyon nga ipadaplin una ang maong hisgutanan kay wa pa nila natun-i human nga atol sa dayong sugod na sa session nila nabasa ang maong report ug nga anaa kini sa ‘other matters,’ wa sa regular nga agenda.
Ang hisgutanan joint committee report sa committee on laws nga gipanguluhan ni Atty. Nilo ‘Olin’ Seno ug committee on assets and properties nga ang chairman mao si del Mar.
Ang gibasehan sa maong’ joint report ang legal opinion sa Mandaue City Legal Office nga angay i-nullify ang kontrata sa City Government sa pagbaligya sa 3.5 ektaryang luna ngadto sa ECODEMCOR, tungod sa nakitang mga kakulian ug kakulangon diha sa mga dokumento.
Ang kontrobersyal nga luna nabaligya panahon sa kanhi administrasyon ni Kongresista Jonas Cortes dihang siya pa ang mayor.
Gibaligya kini sa kantidad nga tag P50 matag metro kwadrado.
Sila Cortes ug Quisumbing ang mag-ilog sa posisyon sa pagka-mayor sa Syudad, sa sunod tuig nga eleksyon.
“Wa gyud koy idea nga ilang gi-join, gi-assume na lang nila nga okay ra ko. So, paghimo sa joint committee report in which ilang gibasehan is the legal opinion of the City legal office, ang nakalain man gud, we were not informed beforehand. We have known about it only during the session, we were provided copies sa pagsud na namo sa session hall and it was included in the other matters. Supposedly issues like this, as big as this, should be included in the regular agenda,” matod ni del Mar.
“What we did, was Kap Manatad moved for a recess and he approached Vice Mayor Carlo, and nisulti nga mohangyo lang mi nga ato lang ni i-defer for further study namo. And it was Vice Mayor Carlo himself who told Ernie nga dili nalang ni nato i-defer. Kining, inhibit na lang mo. That is why we inhibited. And it was Fortuna’s idea, unya nganong moingon man sila nga namulitika mi?,” dugang ni del Mar.
Sila si Konsehal Cynthia Remedio ug Maline Zafra nitug-an usab nga ni-inhibit sila kay buot una nila nga mokonsulta sa ilang abogado pagpasabot sa maong report.
Sila si del Mar, Remedio, ug Zafra lakip sa unom ka mga konsehal nga sakop sa oposisyon nga ni-inhibit sa pagpasar sa joint report atol sa ilang session niadtong Myekules sa hapon.
Ang laing tulo ka mga konsehal mao sila si Malcolm Sanchez, ABC Pres. Ernie Manatad ug SK chairman Dallie Mae Cabatingan.
Dugang nila ni del Mar, Remedio ug Zafra nga kwestyonable usab kon nganong gipasar ang maong joint report diin sa unom ka gikinahanglang pirma, usa lang ang anaa.
Matod sa tulo nga grabeng bokal sa pamulitika na gyud ang luyo sa wa pagkasinabtanay. FMDD