HIGH value target sa syudad sa Sugbo ug Mandaue ang kanhi police recruit, kinsa napatay atol sa buy bust operation sa Barangay Cambaro, dakbayan sa Mandaue alas 8 pasado sa Biyernes sa gabii.
Si Rodric Garro, 43, taga Purok Manga, Brgy. Cambaro, kanhi nipaubos sa police recruit niadtong 2002, apan wa’ nihuman, dead on arrival nga nadangat sa tambalanan.
Human kini giingong nisukol sa kapulisan sa Opao police station sa dihang gipahigayon ang buy bust operation, alas 8:50 Biyernes sa gabii.
Matod ni Sr. Inspector James Conaco, hepe sa Opao Police station, nga sud sa dugay na nga panahon nga gipaubos sa surveillance si Garro.
Atol sa buy bust, sa dihang nagbaluay na sa shabu ug kwarta, giingong nakamatikod si Garro nga pulis ang ka-transaksyon niini.
Kalit kini nga nibunot og armas dayon tion niini sa pulis nga maoy nagsilbi nga poseur buyer.
Hinungdan nga dali usab nga nakapusil ang back-up sa pulis ngadto kang Garro.
Nakuha gikan sa iyang bulsa ang pito ka pakete sa gidudahang’ shabu. Na-recover usab ang .357caliber revolver ni Garro, lakip pa ang pekeng PNP identification (ID) card.
Gitug-an ni Mandaue City Police Office director, P/SSupt. Julian Entoma nga base sa gihimong mas lawom nga pakisusi, nga usa sa nahimong rason sa pag-undang ni Garro kaniadto sa police recruit, mao ang pagkalambigit na niya sa patigayon sa ginadiling drugas.
Dugang ni Entoma nga dugay na usab kini nila nga gipangita, apan giingong idlas kay magbalhinan og lugar sa syudad sa Sugbo, sa Mandaue City ug sa silingang mga lungsod. Dugang ni Entoma nga gawas nga namaligya kini, si Garro usab ang tig-deliver sa mga binultong shabu sa laing lugar sud sa Metro Cebu.
“Tigbalhin-balhin gyud ni siya. Kon maka-detect nga gi-operasyonan na og pulis, dali kaayo nga makabalhin og lugar. Wa ni siya gyud ni-surrender. Gawas sa pagka-pusher, mao sad ni siya mo-deliver na gyud sa butang sa laing lugar sa Consolacion hangtod na sa Liloan,” gitug-an ni Entoma ngadto sa Superbalita Cebu. FMDD