KON mamahimong epektibo, buhaton usab sa Police Regional Office (PRO) 7 ang gihimo nilang liga sa Barangay Tanke, dakbayan sa Talisay nga opisyal nga gibuksan kagahapon.
Tumong sa kapulisan nga ma-divert ang kabatan-unan ug mahilayo sa ilegal nga drugas.
Mismo si PRO 7 Director Chief Supt. Debold Sinas mao ang nangulo sa opening ceremony sa Team PRO 7 Basketball League sa Sitio Tunga, Barangay Tanke, Talisay kagahapon sa buntag.
Aduna’y tema ang liga nga “Sa Liga ikaw ang Bida! Pero sa Droga ikaw ay isang Kontrabida.”
Matod ni Sinas nga 11 ka teams ang maong basketball league diin magduwa kini sila hangtod sa Disyembre.
Dugang niya nga nagpangedaron og 12 pataas lakip na ang mga out-of-school youth nga 20-anyos ug pataas ang lakip sa maong liga.
Gitawag usab nga Pulis Big Brother ang mga coach sa matag team nga gitagsaan og usa ka pulis ug usa ka opisyal isip team manager.
Pasabot ni Sinas nga ang tumong nila nga mahilayo ning kabatan-onan sa ilegal nga drugas.
Kon mamahimong epiktibo kini sa Tanke, himuon usab kini sa ubang barangay sa Sugbo o sa rehiyon nga naghitak ang drugas.
Ang Tanke mao ang labing unang barangay nga gipahigayonan sa PRO 7 niining liga nga batok sa drugas.
Usa ang maong dapit nga ilado nga naghitak ang drugas sud na sa daghang mga dekada.
Pipila ka mga semana ang nakalabay diin labing minos 10 na ka mga tawo ang napatay sa mga anti-drug operations tungod sa giingong pagsukol.