DUNA untay duha ka tawo nga patyon ang duha ka gikatahapang gun-for-hire niadtong Biyernes kon wa pa sila mapatay sa kapulisan sa lungsod sa Dalaguete, habagatang Sugbo human sila giingong ningsukol.
Gibutyag ni Chief Inspector Rolan Aliser, hepe sa Dalaguete Police Station, nga ang sunod unta birahan nila ni Victoriano “Berting” Obiedo ug Rafael “Raffy” Belia kay usa ka police asset ug usa ka sibilyan.
Ang motibo sa pagpatay sa asset may kalambigitan sa gidili nga drugas samtang ang sibilyan giingong ilang nakabikil sa usa ka piyesta sa barangay sa Dalaguete sa miaging semana.
Base sa report nga ilang nadawat, sila si Berting ug Raffy, pulos nagpuyo sa Barangay Nalhug, Dalaguete, mga sakop sa Gañolon-Salonoy gun-for-hire group tulo ka tuig ang nakalabay.
“Apil ni sila sa grupo. Nabungkag lang to kay nangadakpan, nangamatay. Unya kini silang mga bataa mga remnants na lang ni sila, mga sumusunod,” sigon ni Aliser dihang nahinabi sa Superbalita Cebu kagahapon.
Matod niya, ang mga pangan sa duha nitumaw human dunay napatay nga usa ka gidudahan nga police asset niadtong Septiyembre nga gipasanginlan nga maoy nagtudlo hinungdan nga nadakpan ang ilang kaliwat ug dunay napatay sa operasyon sa kapulisan.
Base sa ilang mga impormasyon nga nadawat si Berting ang giingong nagpusil sa asset samtang si Raffy ang nagmaneho sa motorsiklo.
“Actually katong mga tawhana surrenderer to sila, unya nigawas lang ang ilang mga pangalan recently lang, katoy naay napatay last September,” sigon ni Aliser
Giingong ang duha usab ang mga suspek sa pagpamatay nga nahitabo sa Dalaguete ug silingang mga lungsod.
Ilang nahibaw-an ang presensiya nila ni Berting ug Raffy human nitug-an ang usa ka concerned citizen nga dunay duha ka armadong mga tawo nga nag-angkasay sa motorsiklo padulhog sa bukid.
Si Aliser niasoy nga sa wala pa mapatay sila si Berting ug Raffy niadtong Biyernes, sila nag-inom ug didto giingong nipasiatab nga duna sila’y patyon nga mga tawo human nila og inom.
Ang mga lawas sa duha gikuha na sa ilang mga kaliwat.
Gitug-an ni SPO1 Leon Gesim, desk officer sa Dalaguete Police Station, nga niadto sa ilang buhatan kagahapon si Victoriano Obiedo, amahan ni Berting ug si Maria Josephine Belia, asawa ni Rafael ug nipirma og waiver nga nagpahibawo sa ilang desisyon nga dili na nila ipaubos sa autopsy ang lawas sa ilang mga kabanay nga napatay.
Giingong nakigpinusilay sa mga pulis si Berting ug Raffy sa gimontar nga checkpoint sa Sitio Cambanog, Barangay Balud, bukirang dapit, hinungdan nga nangaigo sila sa nagkadaiyang bahin sa ilang lawas nga maoy nakaingon sa ilang kamatayon.
Way giatubang nga kaso ang duha, dugang ni Aliser.