NAG-UNG-ONG na usab ang pagbalik sa laing sabotsabot sa kalinaw sa kagamhanan sa Pilipinas tali sa rebeldeng komunista? Kini human niluwat og pamahayag ang exiled nga komunistang lider nga si Jose Maria “Joma” Sison nga ang Communist Party of the Philippines (CPP) andam moatubang og balik sa sabotsabot.
“The standing policy of the NDFP is to negotiate with the GRP anytime he is ready to resume the peace negotiations in accordance with The Hague Joint Declaration and further agreements,” sumala sa Facebook post ni Sison nga tua sa The Netherlands.
Nunot sa maong pamahayag, gikabalak-an nga ang mga rebeldeng komunista mohimo og estratehikong lakang sa pagpakita sa pwersa ug pagpaila sa ilang presensiya labi na nga umaabot usab ang midtern elections sa Mayo 2019.
Kahinumdoman, si Presidente Rodrigo Duterte nilagda sa Proclamation 360 niadtong Nobiyembre 2017 nga nagputol sa pakigsabotsabot tali sa CPP-New People’s Army-National Democratic Front of the Philippines (CPP-NPA-NDFP).
Nasuko si Duterte dihang dunay gipangbanhigan nga kapulisan ug giataki nga outpost samtang nagpadayon ang ceasefire tungod sa gipahigayon nga sabotsabot sa kalinaw nga gipatung-an sa nasod sa The Netherlands sa Uropa.
“Pero ang problema naman kay Joma Sison ay gusto niya makipag-usap pero hindi naman niya kontrolado ‘yung mga nasa baba niya. Habang nag-uusap, ina-ambush nila ‘yung mga pulis natin,” sumala ni presidential spokesperson ug chief presidential legal adviser Salvador Panelo, kinsa nahinabi sa Super Radyo dzBB kagahapon.
Segurado nga ang kagamhanan nagbantay nga dili masud sa laang hinungdan sa kadugay ug wala maresulbar sulod na sa lima ka dekada nga pakigbisog sa ideyalismo. Ag matuod nga sabotsabot dako og matabang sa kabulahanan sa tanan. Sa gubat way mananaug, pulos maapiki. Bililhong kinabuhi mapildi.