HUMAN midaug og tulo ka bulawan medalya ug duha ka plata sa Asian Para Games 2018 sa Jakarta, Indonesia, Dabawenyong legless para swimmer Ernie Gawilan target karon maka-medalya sa Paralympics Games.
Apan di pa sigurado kung kini mahimo sa Tokyo 2020 Summer Paralympics.
"Magka-medalya sa Paralympics pero layo pa akong langoyon para siguro na," sulti sa 27-anyos, kinsa nagdako sa Paquibato District, sa Facebook interview sa SunStar Davao.
Di sab siya makatuo sa iyang kadaugan sa maong kompetisyon.
"Na-shock lage ko kay first time nahitabo ni nga maka (gold) medal ko sa Asian Para Games unya 43 ka nasud ang nangapil," ingon pa niya.
Ang Jakarta Games ang iyang ikatulong pakigtigi sa Asya. Mibulsa siya og tulo ka bronze sa 2014 Asian Para Games sa Incheon, South Korea.
Dugang niya, "Pero lahi ra gyud ni kay sobra-sobra pa sa award nga nakuha nako sa Asean, lima ka medals sa usa ka dulaan."
Miuli sab siya og duha ka bulawan sa Asean Para Games didto sa Kuala Lumpur, Malaysia.
Matod niya nga gi-grasyahan siya sa Ginoo tungod sa iyang pagpaningkamot sa pagbansay.
"Bisan og nasakit, mag-training gihapon ko," sumala niya nga midugang nga napulo ka bulan iyang preparasyon ug iyang tim atol sa torneyo.
Ang Rio 2016 Paralympian nagpasalamat kang Davao City Mayor Sara Duterte-Carpio sa paghatag og pagtagad alang sa Para athletes sama kaniya ug sa mga Dabawenyo sa ilang suporta.
"Nagapasalamat ko nga Davao akong ginadala nga lugar ug ginapanghinambog nako nga taga Davao ko tungod kay basta taga Davao matinumanon sa balaod ug matinabangon ug maluluy-on. Magtinabangay ta nga ma maintain nato ang maayong record sa Davao City," dugang sa garbo sa Davao.