SUPERBALITA DAVAO

Genoguin: Misurender na kaha ang DoJ?

Kontra Balanse

GITULDOKAN na sa Makati Regional Trial Court, Branch 148 pinaagi ni Judge Andres Soriano ang pag-review sa kasong kudeta ni Senador Antonio Trillanes nga gisang-at sa Department of Justice (DoJ) diin dismissed ang petition niini nga maaresto pagbalik ang senador nga kon gipaburan pa, walay piyansa.

Sa branch 150 piyansado na si Trillanes sa kasong rebellion sa sala ni Judge Almeda mao nga nagpabiling gawasnon ang senador.

Dinhi nanggawas ang mga ispekulasyon nga gipakawat sa Office of the Solicitor General ang mga papeles nga file sa kaso ni Trillanes nga gipasaylo nadaw ni kanhi President Benigno Aquino III.

Ang tanan pulos lamang mga ispekulasyon tungod daghang nagtuo nga imposible kung walay mga orihinal nga kopya labi na sa mga importanteng mga dokumento nga susama niini.

Asa nag-ugat ang pag-utingkay sa kaso ni Trillanes? Sa dihang gipa-imbestigahan niya ang Vigilant Security Agency (VSA) nga kaugalingon ni Solicitor General Jose Calida nga nakakuha og mga kontrata sa mga ahensya sa atong gobyerno usa na niini, ang DoJ, ang mga guwardya iya sa VSA.

Pangutana, kurapsiyon ba kini? Ang tubag, dili. Apan magpabilin kining usa ka "conflict of interest" tungod kay gipahimuslan nimo ang kahigayonan nga anaa ka sa gobyerno, imong gipasud ang imong mga negusyo.

Makatarunganon ba kining gibuhat ni Trillanes? Ang tubag, oo, pero nganong karon lang niya kini gibuhat, tungod kay di na iya ang administrasyon? Ug ang susama niining mga buhat nahitabo usab sa administrasyon ni kanhi PNoy, diin hilom pa sa tirana si Trillanes kay usa man siya sa nakapahimulos.

Niining pagkahitaboa, mo-surender na kaha ang DoJ? Wala naba kaha silay laing paagi aron nga di na magsaba-saba si Trillanes?

Kataw-an karon ang administrasiyon sa mga oposisyon tungod niining hitaboa, duna pa bay laing abilidad si Calida, sama sa iyang pagpalagpot kang Chief Justice Maria Lourdes Sereno pinaagi sa quo waranto? Atong atangan ang sunod nga mga panghitabo.

Sa laing bahin, gisulti na ni Pangulong Duterte nga ang iyang buotang anak si Davao City Mayor Sara Duterte-Carpio, maoy nakapalagpot sa pagka-Speaker ni Pantaleon Alvarez sa Kongreso, pero daghan ang opinyon sa katawhan, dunay motuo, duna sa'y di motuo, ikaw motuo kaba?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph