Pestaño chess: Team Toledo mipatidpatid sa mga kontra

HUMAN sa lima ka rounds, nag-inusara na lang sa liderato ang Team Toledo City sa Cebu Executives and Professionals Chess Association (CEPCA) Boy Pestaño Memorial Open Chess Tournament kagahapon sa Barracks Chess Club sa Robinsons Galleria Cebu.

Ang Toledo City, nga gilangkuban nila ni Bonn Rainauld tibod, Christopher Tubalado ug Carlos Trocio, nakarehistro og perpektong 5.0 puntos ning puntoha sa torneyo.

Nagsunod sa Toledo City mao ang Star Wars Team nga adunay 4.5 puntos gikan sa upat ka mga daog ug usa ka tabla.

Nagbahin sa ikatulo ngadto sa ikapitong puwesto nga pulos adunay 4.0 puntos mao ang Danao City Chess Club, KKK 5, CEPCA B, San Fernando A ug CEPCA A.

Unya nagtapok sa ikawalo ngadto sa ika-13 nga dapit nga pulos adunay 3.5 puntos mao ang Let’s Relax Spa, The Pawn Stormers, Dynamic Decors, Gullan Trading and Construction, Best 5 ug D’Rooks.

Nagkanayon si tournament director Jun Olis nga wala sila magdahom nga ningburot sa 56 ka teams ang ningsalmot sa kompetisyon, nga gisuportahan sa Jemar Engineering Services, Celjem Construction and Development Corporation, Handuraw, Salon de Rose ug Hale Manna.

Ang torneyo, nga nagdalit og dul-an sa P75,000 nga kinatibuk-ang ganti, gipahinungod sa founding president sa CEPCA, anhing Boy Pestaño, chess columnist sa Sun.Star Cebu ug Superbalita. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph