DILI na bag-o alang sa defending champions University of the Visayas (UV) Green Lancers ang pagtaak sa finals sa Cebu Schools Athletic Foundation Inc. (CESAFI) basketball college division apan ang nakalahi lang sa senaryo ning tuiga, makonsiderar sila nga underdog.
Mismong si Green Lancers coach Gary Cortes ang mihangop nga sila maoy underdog sa ilang pagpakigbatok sa No.1 team University of San Jose Recoletos (USJ-R) Jaguars sa best-of-three finals nga sugdan karong Huwebes.
Ang Green Lancers ning-abante pagbalik sa finals pinaagi sa pagdispatsar og sayo sa University of Cebu (UC) Webmasters, 64-62, sa semi-finals sa main game niadtong Sabado sa Cebu Coliseum.
“Kami maoy underdog ani. Almost tanan sa ilang mga beterano intact pa plus nadugangan sa ilang import. Kami, mostly sa among starters wala na this season,” text message ni Cortes ning mantalaan.
Hinuon gipasalig ni Cortes nga buhaton nila ang tanan aron dili mailog sa Jaguars ang titulo gikan kanila hilabi na kay nagtinguha sila og laing Grandslam title ning higayuna.
Dili ikalimod nga grabe ka taas ang moral sa Jaguars ning maong series gumikan sa ilang pagkahimong No. 1 team sa labing unang higayon sa kasaysayan sa liga.
Apan giklaro ni Jaguars rookie coach Leodie Garcia nga iyang gipahimangnuan ang iyang mga magduduwa nga lahi ang kombati sa finals hinungdan nga kinahanglan nilang mangandam og maayo.
”Sa akong observation, wala man gyud mi naglisod nila sa elimination pero sa championship, lahi na ang level sa duwa. Kinahanglang mo-level up gyud ang mga bata,” matod ni Garcia, kinsa sakop sa katapusang Jaguars squad nga nagkampiyon sa college basketball sa Sugbo niadtong 1993 sa Cebu Amateur Athletic Association (CAAA) nga karon mao na ang Cesafi.
“Hinuon, nakuha na man gyud sa mga bata ang among system. Kinahanglan na lang gyud ang mindset nga kaya namo nga mag-champion. Kinahanglan ni kon gusto gyud nilang mag-champion,” dugang ni Garcia.
Sa premirong panagharong sa duha ka mga kampo sa 1st round sa elimination niadtong Agusto 26, gipanglampornas sa Jaguars ang Green Lancers, 89-73.
Nakabawos man tuod ang Green Lancers sa 2nd round sa elimination niadtong Septiyembre 22 apan grabe ka kutas ang ilang naagian una nila napayukbo ang Jaguars, 84-83.
Basi sa resulta sa nangagi nilang mga duwa, dili ikalimod nga maglisod ang Green Lancers batok sa Jaguars apan alang kang Cortes, ang nangagi angayan nang ilubong sa kalimot aron magtutok sa ilang gitinguha sa umaabot.
“Talking about championship game is another story. We will do our best,” matod ni Cortes. (ESL)