MIULBO ang grabeng karambola sa 4th quarter sa panagsangka sa hosts Los Angeles Lakers batok Houston Rockets kagahapon sa labing unang pagduwa ni 4-time MVP LeBron James sa Staples Center isip usa ka sakop sa Lakers sa National Basketball Association (NBA).
Sa nahabiling 4:13 minutos sa kombati diin mingdaog ang Rockets, 124-115, kalit lang nagsumbagay ang duha ka beteranong pointguards nga sila si Rajon Rondo sa Lakers ug Chris Paul sa Rockets.
Nadugkatan kining maong kagubot dihang agresibong milusot si Rockets superstar James Harden, kinsa gi-foul ni Brandon Ingram sa Lakers.
Human niini, gitukmod ni Ingram si Harden ug nagkalalis ang duha nga maoy nagsugod sa kaguliyang.
Samtang padayon ang kaguliyang, nakita nga gitulisok ni Paul si Rondo unya mibawos si Rondo pinaagi sa pagukmag kang Paul ug nagsinukmagay na ang duha.
Si Ingram, kinsa nahilayo na unta sa esena, kalit lang midagan ug gisukmag niini si Paul samtang si James nagpadayon sa pag-uwang sa mga nangahilambigit.
Nagkanayon si Paul nga napungot siya og maayo gumikan kay giluwaan siya ni Rondo. Hinuon sa mga replay sa video, wala nakita kining maong esena.
“Some spit was thrown,” matod ni Rockets coach Mike D’Antoni sa postgame interview.
Tungod sa karambola, taodtaod sab nga nahunong ang duwa una nakapagawas og desisyon ang mga referee diin na-ejected sila si Paul, Rondo ug Ingram.
Gilauman nga mopahamtang pa’g dugang silot ang NBA sa mga nangahilambigit sa karambola.
Nagkanayon si Harden nga bisan naa siya sa duol sa nahitaboan sa sinumbagay, wala siya nakabantay niini gumikan sa ka kalit sa panghitabo.
“I honestly don’t know. It happened really, really quick,” matod ni Harden, kinsa maoy kasamtangang MVP.
Ang bag-ong sakop sa Rockets nga si Carmelo Anthony nakasaway og maayo ning maong panghitabo.
“Unacceptable,” asoy ni Anthony. “We all know what happened. Ain’t no need to keep going back and forth about that. What happened was unacceptable. It shouldn’t have happened.”
Ang Rockets, nga natagak sa 1-1 nga rekord, gipangulohan ni Harden pinaagi sa iyang 36 puntos, nidugang og 28 puntos samtang nitunol og 19 puntos si Clint Capela.
Ang Lakers, nga natagak sa 0-2 nga baraha, gipangulohan ni James pinaagi sa iyang 24 puntos samtang aduna pa sila’y laing unom ka mga magduduwa nga nakamugna og dobleng numero nga puntos. (AP, ESL)