KAPIN sa P700,000 nga budget ang natunol sa Lapu-Lapu City government nga cash incentives alang sa unang batch sa mga Oponganon nga board passer ug topnotcher sa nagkadaiyang kurso ning tuiga.
Adunay 132 ka mga passer ang nakapahimulos sa cash incentives nga personal gitunol ni Mayor Paz Radaza niadtong miaging semana nga gipahigayon sa Session Hall sa Lapu-Lapu City Hall.
Moabot ngadto sa 129 ang mga board passer nga nakadawat og tag-P5,000.
Samtang sila si Redendo Apa, 8th placer sa Mechanical Engineering Licensure Examination ug laing rank 8 nga si Ommar Pacalundo sa Medicine Licensure Examination ang adunay tag-P30,000.
Ang nursing graduate nga si Dexter Redd Gomez nahimutang sa 9th place sa Nursing Licensure Exam ang gitunolan og P20,000.
Magsilbi kining ikaduhang tuig sa pagpanghatag og cash incentive sa siyudad nga naghatag og kadasig sa mga tinun-an nga makakab-ot og taas nga puntos sa pasulit o exam sa bisan unsang kurso.
“I am happy to see all of you successful in your field and I thank each one of you for bringing pride to our City,” tipik sa mensahe ni Radaza.
Panghinaot sa mayor nga ang mga bag-ong graduate mamahimong “partners for change” alang sa kalambuan sa dakbayan ug magsilbing sumbanan sa ubang tinun-an nga magtarong sa pagtuon. (FVQ)