MODERATELY affected sa ilegal nga drugas ang tanang barangay sa dakbayan sa Mandaue. Kini ang gipahibaw ni Mandaue City Police Office director Julian Entoma.
Hinungdan nga giangkon ni Entoma nga lisud pa nga adunay barangay sa siyudad sa Mandaue nga madeklarar nga drug-cleared.
Gipasabot hinuon ni Entoma nga tungod kini kay tanang barangay adunay kapin sa usa ka porsiyento sa kinatibuk-an populasyon ang mga drug surrenderer.
Dul-an sa dos porsiyento ang labing ubos ug 14 porisyento ang labing taas, nga mao ang sa barangay Subangdaku.
Ang Subangdaku ang nag-una sa listahan sa top five sa moderately drug affected, gisundan sa Tipolo, Looc, Opao ug Paknaan. Ang top five nga barangay gipasabot ni Entoma, gibasehan sa gidaghanon sa mga drug surrenderer gikan Hulyo 2016 hangtud ning tuiga.
Nag-una ang Subangdaku, adunay 581 surrenderers, gisundan sa 564 sa Tipolo, kapin sa 300 sa Looc, kapin sa 200 sa Opao ug kapin sa 100 sa Paknaan.
Kini alang na unta sa tinguha nga barangay drug-clearing program, diin giangkon ni Entoma nga lisud pa sa dakbayan sa Mandaue.
“Ato sila (ang mga barangay opisyal) gipahibawo sa drug situation sa siyudad, tanang barangay moderately affected kay sa atong parameter sa
barangay drug clearing program, kon ang surrenderer sa barangay moabot og more than one percent, moderately affected na. Ma-seriously affected na kon adunay drug den sa barangay,” gipasabot ni Entoma sa Superbalita Cebu.
“Gihimo usab na ang ranking alang sa himuong monitoring nila sa ilag mga surrenderers, kon pila ani nila ang napaubos sa rehabilitation, kinsa pa ang nagpadayon sa rehab, kinsa ang wala na diha sa barangay, kinsa ang ilang nahibaw-an nga nibalik sa paggamit,, ug uban pa,” dugang ni Entoma.
Nag-una usab sa listahan sa labing daghan nga nasikop sa anti-drug operations ang Barangay Centro ning tuiga, apan giklaro ni Entoma nga kasagaran kanila nasikop pinaagi sa checkpoints ug kadaghanan di taga Mandaue y kundi sa silingang mga siyudad ug mga lungsod sa amihanan.
Ang Centro usab ang ikaunom sa mga barangay nga moderately affected sa gidiling drugas. (Fe Marie D. Dumaboc, Correspondent)