NAALARMA karon ang kadagkuan sa Department of Health (DOH) 7 human nisaka og maayo ang kaso sa tipdas diin natala nga niabot na kini sa 559% ang pagsaka karong tuiga itandi sa nakalabay nga tuig.
Sa labing uwahing datus sa Regional Epidemiology & Surveillance Unit (Resu) 7 niabot sa 290 ka kaso ang natala sa Central Visayas (CV) diin usa usab ang patay. Ang maong kaso gikan kini Enero hangtod Oktubre 13 ning tuiga.
Itandi sa 44 ka kaso lang sa susamang petsa niadtong 2017.
Karong tuiga, nag-una ang Dumaguete City nga aduna’y natala nga 46 ka kaso, gisundan kini sa 27 ka kaso sa Bacong sa Negros Oriental, ug sa dakbayan sa Sugbo diin 19 ka kaso ang natala.
Usa sa rason nga nakita sa DOH 7 kining pagdumili sa mga ginikanan nga hatagan ilang anak sa maong bakuna.
Matod ni Ruff Vincent Valdevieso, Nurse III - Child Health Program Coordinator sa DOH 7 nga usa sa gihimo nila karon sa DOH mao ang “Ligtas Tigdas, door-to-door” diin usa kini ka Supplemental Immunization Activity (SIA).
Natala ang usa ka patay sa tipdas sa lungsod sa Tuburan.
Dugang ni Valdevieso, tanang bata nga 6-month hangtod sa 59-month old, kinahanglan nga mabakunahan.
Duha usab ang ihatag nila sa DOH 7 nga bakuna alang sa tipdas aron masiguro nga immune na ang bata sa virus sa maong sakit.
Uwahing natala ang outbreak sa tipdas sa Dumaguete diin pipila ka indibidwal sa usa ka komunidad ang nasakit human matakdi. (HBL)