DUHA ang nalandig sa tambalanan lakip ang senior citizen nga babaye human gipusil sa managlahing insidente sa pagpamusil sa dakbayan sa Sugbo niadtong Sabado sa gabii ug kagahapon sa buntag.
Ang senior naila nga si Matilyn Misa, 60, kinsa gipusil ni Jemcee Bulawit, hamtung, sa Sitio Happy People, Brgy. T. Padilla, dakbayan sa Sugbo.
Nahitabo ang maong insidente alas 6:30 sa buntag kagahapon.
Nasayran nga paingon pauli sa iyang panimalay si Misa dihang kalit lang nga naabot si Bulawit ug gipusil kini.
Nakaangkon og samad pinusilan si Misa sa baba ug sa abaga niini. Padayon pang gipangita ang mamumuno.
Niadtong Sabado sa alas 11:15 sa gabii dihang kalit usab nga giduol ang biktima nga si Clint Español ug gipusil.
Si Español kuyog ang iyang uyab naglakaw sa Don Gil Garcia St., Barangay Capitol Site, dakbayan sa Sugbo dihang naabot og kalit ang usa ka lalaki. (HBL)