IPATAN-AW una sa Cebu City Transportation Office (CCTO) sa iyang planning division sa dili pa mopatuman og rerouting alang sa hangyo sa Cebu Link Joint Venture (CLJV) nga mogamit sa north bound lane sa Cebu South Coastal Road (CSCR) sud sa gipili nga mga oras.
Matod ni Francisco “Isko” Ouano, operations chief sa CCTO, nga kinahanglan nga estudyohan og maayo ang dapit aron dili usab mabara ang dagan sa trapiko sa mga sakyanan nga molabay niini.
Ang CLJV nihangyo sa kagamhanan sa dakbayan sa Sugbo nga ipagamit ang north bound lane sa viaduct sa CSCR gikan alas 10 sa gabii hangtod sa alas 4 sa kaadlawon aron mapaspasan ang concrete pouring operation alang sa nagpadayon nga katukoran sa ikatulong taytayan.
Sa suwat ngadto kang Cebu City Mayor Tomas Osmeña pinetsahan og Oktubre 3, si Julio Ruiz Cabrero, representante sa CLJV, nihangyo nga i-reroute ang mga sakyanan ngadto sa U-turn slot sa viaduct dayon sa Mambaling Access Road sud sa unom ka oras, sugod sa alas 10 sa gabii hangtod sa alas 4 sa kaadlawon. Wa nuon nakabutang sa suwat sa CLJV kon kanus-a mahimo magsugod ang rerouting.
Sigon ni Ouano nga kon kinahanglan kuhaon ang railings dapit sa SM Seaside ila kining buhaton aron dili mabalda ang pagtrabaho sa ikatulong taytayan kun Cebu-Cordova Expressway (CCLEX).
“Kita sad mismo mohimo sa atong trabaho aron matabangan sad nato sila within that span of time,” dugang ni Ouano sa Superbalita Cebu.
Ang konseho sa dakbayan sa Sugbo nitugot sa hangyo sa CLJV atol sa ilang session niadtong Oktubre 16 ning tuiga. (SCG)