Sara Duterte mobisita sa Sugbo karon

ANAK sa presidente sa nasod ug Davao City Mayor Sara Duterte-Carpio ania sa Sugbo karong adlawa, diin usa sa katuyuan niini mao ang pagduaw sa dakbayan sa Mandaue.

Kini alang na sa ilang pagpinirmahay ug pagpanumpa alang sa pagpakig-alyansa sa grupo ni Mandaue City Mayor Luigi Quisumbing ngadto sa regional party ni Sara ang Hugpong Ng Pagbabago (HNP).

Gitug-an ni Mayor Quisumbing nga gawas sa ilang tibuok slate, sila bise mayor Carlo Fortuna ug ilang mga konsehal alang sa sunod tuig nga piniliay sa dakbayan sa Mandaue, wa silay giimbitar nga mga dagkong personalidad sa probinsya sa Sugbo.

Adunay himuong programa diha sa Mandaue City Sports Complex, alas 10 ugma sa buntag, gawas sa pagpinirmahay nga naglangkob na niini ang oath taking.

Gilantawan nga naa usab ang pipila sa representante sa matag barangay sa siyudad.

Gitug-an ni Quisumbing sa Superbalita Cebu nga mahinungdanon ang maong ilang pagpakig-alyansa sa HNP tungod sa susama nila nga tinguha ang pagbatok sa kurapsyon ug ilegal nga drugas.

“We believe in the leadership of the President and Mayor Sara who I believe will be the next President of the Philippines. Our alliance is a symbol of our strong belief that corruption and drugs should be eradicated,” text ni Quidumbing sa Superbalita Cebu.

Samtang sa di pa himuon ang programa alang sa maong pagpakig-alyansa, blessing ug turn over ceremony alang sa labing unang Drug Recovery Clinic sa Kabisay-an nga gitukod sa compund sa Mandaue City Hospital sa alas 8:30 sa buntag.

Usa sa mga assistant secretary sa Department of Health (DOH) ang pinasidunggang dinapit.

Ang recovery clinic nga gigastuhan sa DOH og P2 milyones, nga gisugdan sa pagpatukod sa niaging tuig.

Ang recovery clinic (RC) i-man sa mga kawani sa Mandaue City Health Office alang na sa kinahanglan nga social workers ug psychologist nga nipaubos na usab og training alang niini.

Gitug-an usab ni Quisumbing nga mapasalamaton siya kang SAP Bong Go nga maoy nitabang sa pag-facilitate sa iyang hangyo alang sa naasoy nga katukuran sa RC. (FMDD, Correspondent)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph