IPRESENTAR sa Mines and Geosciences Bureau (MGB) sa Central Visayas (CV) karong hapon ang mga resulta sa ground penetrating radar (GPR) ug georesistivity surveys (GRS) nga gipahigayon sa mga geologists.
Kini atol sa dialogue uban sa mga pamilya nga naapektuhan sa pagdahili sa yuta ug mga opisyal sa kagamhanan sa dakbayan sa Naga.
Ang dialogue magsugod ala 1:00 sa hapon diin gipaabot motambong si Department of Environment and Natural Resources (DENR) Secretary Roy Cimatu.
Naa usab sila si DENR 7 Regional Executive Director Gilbert Gonzales, MGB 7 Officer-in-charge Efren Carido ug Environmental Management Bureau (EMB) 7 Regional Director William Cuñado.
Matod ni Marian Codilla, information officer sa MGB 7, nga pinaagi sa GPR ug GSR surveys mahibaw-an kon unsay nakaingon sa pagdahili sa yuta sa Barangay Tina-an niadtong Septiyembre 20, diin 78 ang patay, daghang nangaangol ug upat ang missing pa. (SCG)