DUHA nga nagsakay og motorsiklo ang nabiktima sa hit-and-run sa national highway sa Barangay Poblacion Ward 2, lungsod sa Minglanilla kagahapon sa alas 2:20 sa hapon, patay ang angkas.
Si PO3 Junyl Ater sa Minglanilla Police Station niila sa namatay nga si Henry Tabay, taga Barangay Campo 4, dakbayan sa Talisay.
Dugang ni PO3 Ater, napisat ang ulo sa angkas human naligsan dihang natumba human na-hit-and-run sa usa ka trailer truck nga nagdala sa plak nga GUJ-431.
Samtang, angol ang nagmaneho sa motorsiklo nga si Mark Lester Abatayo, 29, taga Barangay Linao Lipata, lungsod sa Minglanilla.
Si PO3 Ater nagkanayon gna ang duha pulos trabahante sa Popular Feeds.
Gikan kini sa ilang trabaho padulong mopauli, apan sa wala pa sila mamauli, gikatahong nag-inom ang mga biktima sa Sitio Bacay, Barangay Tulay, uban sa ilang mga higala.
Apan nanglakaw ang duha padulong sa Poblacion Ward 4 aron hapiton nila ang laing amigo nga gikatahong naa sa KTV-bar sa maong apit. Apan sa pag-abot nila, wala na didto ang ilang higala hinungdan nga milahos na lang sila sa pagpauli.
Pag-abot nila sa nahisgutang dapit, kalit lang silang gidaro sa trailer truck.
Natumba ang motorsiklo pero wala mohunong ang drayber sa trailer truck ug nidiretso hinuon sa pagpadagan hinungdan nga nalatayan ug maayong pagkapisat sa ulo ni Tabay.
“Mao na atong nakuhang info nga nag-inom lagi ni sila samtang mopauli basin unsa kaha ang sitwasyon samtang nagdagan kalit raman gidaro daw sa trailer, dugang ni PO3 Ater.
Dugang sa pulis, usa ka nagpakabanang drayber sa habalhabal maoy naghatag og impormasyon sa kapulisan human iyang gigukod ang trailer truck ug gisulat ang plate number.
Ang kapulisan nipahigayon og dugang imbestigasyon. (S)