GIANGKON sa Pambansang Kamao, Manny Pacquiao nga wala na gayud siya makaangay sa mga bag-ong intriga nga nanggawas bahin kaniya ug kang Krista Ranillo.

Ning bag-ohay lamang, nigawas ang chika nga gipalitan ni Manny og P5 million nga kantidad sa mga alahas si Krista didto sa Amerika.

May chika sab nga todo-grocery si Krista sa States nga of course, sponsored ni Manny.

Giintriga sab nga sa usa ka condo unit nagpuyo ang Pambansang Kamao ug ang sexy starlet.

Sumala ni Manny, di makatarunganon ang maong intriga nga daw nigawas nga wa'y laing tumong gawas sa pagpanglubog lamang sa ilang pamilya.

Sey ni Manny nga di na niya gusto nga mausab pa ang nahitabo kanila sa asawa nga si Jinkee diin nasamok ang dagan sa ilang relasyon late last year tungod gihapon sa isyu kang Krista.

Di na sab buot pang hisgutan ni Manny ang chismis nga naglambigit kang Jinkee ug sa aktor nga si Derek Ramsay.

Alang ni Manny, nonsense kini nga isyu.

Gitug-an sab sa boksidor nga kasamtangan na siyang nagakunsulta sa mga abogado aron nga makahimo og lakang batok sa mga tawong nagpakatag og di maayong chismis bahin kaniya ug sa iyang pamilya.

Buot ni Manny karon nga makatutok sa iyang pagbansay isip pagpangandam sa pakigsangka kang Joshua Clottey.