GIPASABOT og maayo ni kanhi Cagayan de Oro Mayor Vicente ‘Dongkoy’ Emano nganong nagpapili kini pagka bise mayor alang sa umaabot nga piniliay sa tuig 2019.
Miduso si Dongkoy sa iyang sertipiko de kandidatura niadtong katapusang adlaw sa filing sa certificate of candidacy (COC) sa buhatan sa Commission on Elections (Comelec) taliwala pa sa iyang mga naunang interbyu nga dili na siya magpapili sa umaabot eleksyon.
Giklaro ni Dongkoy, kinsa nagpangidaron karon og 75 anyos, nga ang iyang anak nga si Councilor Nadya Emano nga anaa na sa iyang katapusang termino mao gyod unta ang napulsohan sa partido sa PaDayon Pilipino nga maoy magpapili sa umaabot nga eleksyon sa pagka bise mayor, partner sa ilang gituboy nga pagka mayor nga si Department of Agriculture Undersecretary Pompee La Viña.
Tungod kay daw ang kapikas niining si Board Member Prexy Elipe magpapili pagka bise-gobernador sa Misamis Oriental rason nga miatras si Nadya sa posisyon.
“To be honest with you wala ko makatulog niadtong gabhiona but it’s already there. Daghan akong kauban nga mga manyahon pud nga gaingon nga ‘kung di ka modagan magsibog nalang mi.’ matud ni Dongkoy ug aminadong napugos lamang siya niini nga posisyon.
“Tungod kay dili naman gyod modagan si Kagawad Nadya, wala na gyod koy mahimo napugos nalang gyod ko nga modagan na lamang. Maoy hinungdan naa ko diri nagkandidato pagka bise mayor,” dugang niini ug miingon nga wala siyay gihagit nga bisan kinsa.
“But let me once again emphasize one thing, it is not to challenge whoever are there but it is only to try to offer myself to the people of the city and hopefully if you think I can do better they would help but definitely not to challenge to anybody,” pagklaro niini.
Samtang suportado ni Misamis Oriental Governor Yevgeny Vincente “Bambi” Emano ang iyang amahan nga si Dongkoy sa pagpapili niini isip bise mayor sa siyudad.
Daw matag usa kanila aduna’y kaugalingon nga panglantaw sa laraw sa pulitika ug bisan pa nga magpapili kini pagka konsehal, pagka mayor, o bisan paman president sa nasod, daw iya kining suportahan.
“Matag-usa kanamo adunay kaugalingon nga panglantaw sa laraw sa pulitika. Pero bisan paman magpapili siya sa pagka konsehal, pagka bise mayor, mayor, kongresista, o bisan presidente sa nasod ug bisan unsang posisyon, akong suportahan sa rason nga nagmatuo mi ug gitudloan mi sa among amahan sa katarong ug kalig-on sa pulitika nga dili angay nga mahanaw siya sa iyang pagpangalagad, “ matud ni Bambi.