USA ka patay'ng lawas sa lalaking gikatahong nahanaw ang napalgan nga naglutaw-lutaw sa usa ka sapa didto sa Purok 1, Kimintang, Barangay Maniki, lungsod sa Kapalong, Davao del Norte.

Giila sa kapulisan ang biktima nga mao si Jerson Villanueva, hamtung ang panuigon ug molupyo sa susamang dapit.

Sa report gikan sa Davao del Norte Police Provincial Office nasayran nga pasado alas 8:00 sa buntag niadtong Miyerkules napalgan ang biktima nga wa nay kinabuhi nga naglutaw sa sapa.

Ang inahan sa biktima nga si Evangeline maoy mipatim-aw sa buhatan sa Kapalong Municipal Police Station ug maoy miila sa patay'ng lawas.

Niadtong Enero 31 pa gikatahong nawala ang biktima.

Sa gihimong pakisusi sa mga otoridad nasuta nga posibleng giatake sa iyang sakit nga patol ang biktima dihang naligo kini sa sapa hinungdan nga nalumos.

Sumala sa kabanay sa biktima nga niadtong nag-edad pa kini og 17-anyos nagsugod na ang sakit niini nga patol.

Wa say nakitang timailhan ang mga otoridad nga gipatay ang biktima.

Apan luyo niini, kapulisan mihimo gihapon og dugang imbestigasyon sa hitabo. (Marvin Pineda)