Drayber giluthang, patay

WA NA matabang ang usa ka drayber sa motorsiklo nga dunay sidecar sanglit patay na siya dihang miabot sa tambalanan human siya gipusil kagahapon sa kaadlawon didto sa Crossing Puan, Barangay Talomo, siyudad sa Davao.

Ang biktima giila sa kapulisan nga mao si Bernie Ebotolan, 18, nagpuyo sa Kabataan Center Village, Barangay Bago Gallera, ning siyudad.

Base sa imbestigasyon ni PO2 Wilfredo Gallego sa Talomo Police Station, ang biktima gipusil sa wa mailhing lalaki samtang naglingkod siya sa iyang gimanehong motorsiklo nga dunay plate number JO-7336.

Nasayran nga nagparada lamang ang biktima atubangan sa Karen Store apan giduol siya sa lalaki nga gilarawan lamang nga niwangon ang panglawas, nagsul-ob og jacket ug kalo.

Mga nakasaksi sa hitabo nagbutyag sa kapulisan nga sa way igong rason, gipusil sa mamumuno ang biktima tumong sa iyang walang nawong hinungdan sa iyang pagkatumba.

Ang mamumuno giingon nga daling mibiya sa nahitaboan sa krimen samtang ang biktima daling gidala sa St. John Hospital.

Sa paghiabot sa biktima sa maong tambalanan, gideklara dayon siya sa mga doktor nga nag-atiman kaniya nga dead on arrival dihang miabot sa tambalanan.

Ang maong hitabo gisusi na sa kapulisan aron sayron kung unsa ang motibo sa mamumuno aron maoy maghatag og ideya sa kapulisan nga mailhan ug masikop ang mamumuno. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph