ANDAM na matud pa ang Communist Party of the Philippines (CPP) nga mobalik sa pagpakigsabot tali sa gobyerno sa Pilipinas.
Kini subay sa pamahayag ni founding chairman Jose Maria "Joma" Sison nga gi-post sa iyang Facebook page. Apan kini mag-agad pa, matud pa, kang Presidente Rodrigo Duterte aron nga tapuson ang iyang posisyon pag-undang sa negosasyon pinaagi sa Proclamation 360.
Sumala pa ni Sison nga ang "standing policy" sa National Democratic Front of the Philippines (NDFP) mao nga makigsabot uban sa Government of the Republic of the Philippines (GRP) bisan unsang orasa kon andam na siya (Duterte) subay sa The Hague Joint Declaration ug dugang pang mga gikasabutan.
Ang NDFP mao ang "political wing' sa CPP, samtang ang New People's Army mao ang iyang armadong kusog.
Ang Proclamation 360, gilagdaan ni Duterte niadtong Nobyembre 2017, nag-undang sa paghinabi tali sa CPP-NPA-NDFP).
Nindot kini nga katikaran nga mabalik ang pagsabot-sabot aron nga mahunong na ang kapin 50 ka tuig nga insurhensiya sa nasud ug maangkon na ang hingpit nga kalinaw.
Dugay na nga andam ang gobyerno nga makigsabot ngadto sa mga rebelde. Apan giseguro lang sab sa Malacanang nga di mahimong masayrang ang paningkamot kay kapila na baya ka higayon nahagba ang pagsabot-sabot.
Di buot sa administrasyon ni Duterte nga subli na sab kining mapurnada sa umaabot nga panahon kay di na sab magkasinabot sama sa mga nahitabo kaniadto.
Kini human nga giangkon mismo ni Sison niadtong milabay nga panahon nga gusto siyang nga makighinabi sa gobyerno apan di matud pa niya kontrolado ang mga naa sa ubos niyang mga sakop.
Kay samtang nagsabot ang duha ka bahin, dunay mga higayon nga mangambus ang mga NPA sa tropa sa kagamhanan.
Busa, kon di kontrolado ni Sison ang iyang mga sakop sa ubos, way kapuslanan aron nga makighinabi pa ang gobyerno kaniya ug sa mga taas nga opisyal sa NDFP?
Mas nindot kon ipursige na lang sa gobyerno ang "localized peace talks" uban sa mga rebelde imbis nga mag-agad ngadto sa ilang mga tag-as nga opisyal nga di man sab makakontrolar kanila.
Lain kini nga estratihiya sa hinabing pangkalinaw kay basin pa unya og mas epektibo kini nga pamaagi, inay makig-atubang kang Sison ug sa mga lider sa NDFP.