MOKABAT sa P1 milyon ang kinatibuk-ang kantidad sa salapi nga natangag sa wa pa mailhing kawatan nga misulod sa usa ka iladong tindahan sa Lanang Davao City, Sabado sa gabii.
Subay sa imbestigasyon sa Sasa Police Station, usa ka Vivian Villalobos Colanag, store supervisor, nagbutyag nga iyang namatikdan nga ang pultahan sa ilang storage room diin ginatago ang kuwarta, pugsanong giguba.
Dihang gisusi nadiskubrehan nga nawala na gikan sa maong lugar ang kuwarta nga mobalor sa usa ka milyon ug gituhoang gikawat.
Dihang gisubay na ang kuha sa closed-circuit television (CCTV) camera nakita ang usa ka lalaki nga nakasuot og itom nga jacket, naay hood, puti nga t-shirt ug itom nga jogging pants.
Sa pagsulod sa lalaki, gikuha niini ang mga kuwarta dayon dali kining migawas.
Padayon ang gihimong imbestigasyon sa kapulisan sa Sasa labot sa maong hitabo aron maila ug masikop ang suspetsado. (Richy Nalagon)