ABI nako kung ekspresyon o "fake news" lang ang iring gibidli ug iring gi-ligate. Mahibaloan ba diay nato kung gibati'g bidli ang iring ilabi na ang mga iring sa dalan (isda) o pusang kalye (pusakal)? Puwede ba diay'ng ipa-ligate ang iring sama sa tawo?
Niadtong Septyembre 27-28, nagpahigayon ang atong City Veterinary Office ug ligation ug pagkapon sa sobra 300 ka mga iring ug iro sa compound sa Davao City Police Office sa dalang San Pedro.
Ang technical nga terminolohiya sa pagkuha sa obaryo sa babayeng hayop kay "spaying" samtang "neutering" usab ang pagtangtang sa itlog sa lalaki aron dili makaanak.
Ang medical terms niini sa tawo kay "ligation" samtang "vasectomy" ang sa lalaki.
Sa mga unang panahon sa Ehepto, ginakapon pinaagi sa "castration" ang tanang ulipong lalaki nga nagbantay sa ilang reyna ug prinsesa. Pagseguro kini nga dili mabuntisan og ordinaryong ulipon ang ilang gialagaran.
Sumala sa taho, nagpahigayon ang City Vet og susamang kalihukan nga libre makausa matag tuig nga gikalipay sa mga pet owners.
Sa pagkatinuod, mahal ang proseso sa spaying ug neutering sa pribadong beterinaryo.
Nahiapil kami sa organisasyon sa nag-atiman og iring kay aduna kami upat ka Persian cats nga hinatag sa among higala kay kanunay atakihon og hubak ang iyang anak sa balahibo sa iring.
Dili diay sayon ang pag-atiman og iring kay mahal ang tambal ug pagkaon.
Niadtong niaging tuig gidala namo sa tambalanan ang duha ka iring kay nahilo sa spray para sa lamok ug ok-ok. Gibutangan dayon sila'g dextrose kay hapit na mamatay. Kinahanglan sab nga palitan sila'g "litter box" diin didto sila mangihi ug malibang.
Aduna kini sulod nga balas ug yuta nga mopauga sa ilang hugaw.
Duna sab silay lahi nga bitamina, sabon ug shampoo aron nindot tan-awon ang ilang buhok ug walay pulgas. Kinahanglan sab diay sila mokaon og sagbot nga motabang sa pagtunaw sa ilang kinaon ug ilang tambal sa bidli o sakit sa tiyan.
Mao diay nga makita nato ang iring nga mokaon og dahon sa sagbot unya mosuka kay naa silay gibati sa tiyan ug aron mogawas ang buhok nga ilang malamoy sa pagtilap sa ilang lawas.
Tungod niini nagpatubo kami og "cat grass" nga sa among paminaw kay pamilya sa "wheatgrass" nga ilang kaon-kaunon. Aron makalikay sa rabies, kinahanglan nga pabakunahan sila matag tuig kay bisan sa gamay lang nga kambras puwede mataptan ang tawo.
Daghang nalipay sa gihimo sa City Vet Office kay paagi usab niini makunhuran ang gidaghanon sa mga "pusakal", "isda" ug asong kalye.
Tiaw mong puwede sila makaanak og hangtud 12 ka buok kaduha o makatulo matag tuig?
Pila ba ka tawo ang namatay sa rabies tungod sa pagpasagad sa nag-atiman og hayop?
Busa congrats sa City Vet ug unta magpadayon kining maong programa ug mahatagan og kahibalo sa responsableng pag-atiman sa hayop ang katawhan. Meow!