NAKIGTAGBO na sab ang mga personahe sa Commission on Election (Comelec) ngadto sa tanang hepe sa kapulisan sa probinsya sa Davao del Sur kagahapon sa buntag.
Gihimo ang tigom sud sa conference room sa Davao del Sur Provincial Police Office (DDSPPO), ug gihisgutan ang seguridad sa lalawigan ilabina nga kapin tulo ka bulan na lang mahitabo na ang National ug Local Elections.
Si Lawyer Maria Febes Barlaan, provincial election supervisor, nagkanayon sa Sun. Star Superbalita, nga ilang gihisgutan ang mga lugar nga kinahanglan ang hugot nga atensyon sa kapulisan ug militar aron di masubli ang mga bayolenteng hitabo sa mga niaging piliay.
Dinhi nadugangan pa ang mga lungsod nga giingong "areas of concern" alang sa Comelec.
Di pa dugay, gideklara sa kapulisan nga election hot spot ang mga lungsod sa Malita, Don Marcelino ug Magsaysay, giingong apil na sab karon ang lungsod sa Matanao ug pipila ka barangay sa lungsod sa Bansalan.
Gibasehan sa mga otoridad ang paglambigit sa Malita tungod sa nahitabong kamatayon sa mag-amahang sila si Isidro ug Danny Sarmiento, kinsa giingong napatay sa mga gwardiya ni kanhi 2nd District Representative Claude Bautista, human matod pa nga nanguha og mga election returns niadtong higayona.
Nahitabo ang pagsukol sa mga gwardiya human gihulagway nga gipusil ang ilang amo apan wa maigo gumikan kay nakadagan sa iyang sakyanan.
Samtang sa Don Marcelino, ang mga Barangay Lamidan ug Baluntay, maoy giigong tutukan gumikan sa init nga bangi sa pulitika.
Giapil sab ang lungsod sa Matanao, human giingong pulitika ang hinungdan sa paglabay og granada sa usa ka balay sa miaging tuig.
Sa Bansalan, ang Barangay Linawan maoy usa nga tutukan sa kapulisan human gipatay si kanhi Kapitan Gennie Espina, tuig 2004.
Samtang sa Magsaysay, gilantaw nga init gihapon ang piniliay didto human gisuwayan nga pabuthan og landmine ang sakyanan ni kanhi mayor ug Bise Mayor Arthur Davin.
Hinuon, giingong i-plastar pa sa Comelec ang padayong pagkuha og mga datos alang sa mga lugar nga hot spot kun gitawag og Election Areas of Concern (EAC) ug Election Areas of Immediate Concern (EAIC). (Orlando B. Dinoy)