MOKABAT ngadto sa 38 ka mga buot mokuha og examination alang sa Police Officer (PO) 1 ang gipailalom sa imbestigasyon human masakpan ang alegasyong leakage nga anaa sa ilang mga cellphone, Domingo sa buntag.
Sumala ni Chief Inspector Ronald Lao, hepe sa Talomo Police Station nga ang PO1 examination, gipahigayon sa usa ka tulunghaan sa McArthur Highway, Matina ning dakbayan.
Sa permero, usa lamang ang nasakpan nga dunay leakage sa iyang cellphone, dihang giimbestigahan, napasa pasa na diay ang maong leakage sa ubay ubay ka mga mokuha sa maong eksaminasyon.
Gumikan niini, mitabang na usab ang San Pedro Police Station sa pag-imbestiga gumikan kasagaran sa mga nagkuha sa eksaminasyon anaa temporaryong nagpuyo sa mga hotel sa downtown area nga sakop sa San Pedro PNP.
Gibutyag ni SPO1 Rizalito Clapiz III, chief investigator sa San Pedro PNP nga ubay ubay sa mga cellphone ang nakumpiska sa mga nahisgutang 38 ka mga mikuha sa maong eksam.
"Naa sa ilang mga cellphone, kompleto may questions unya may answer napod," sumala ni Clapiz nga nahinabi sa SuperBalita Lunes, Oktubre 22.
Gumikan niini buot sa National Police Commission (Napolcom) nga i-ban o did-an na nga makakuha og bisan unsa nga klase sa eksaminasyon sa Napolcom ang 38 ka tawo nga nasakpan migamit sa naasoy nga leakage.